Тәжікстан президенті Эмомали Рахмон Иранның бұрынғы жоғары рухани көшбасшысы аятолла Әли Хаменеимен қоштасудың ресми рәсіміне қатысады, деп хабарлайды "Адырна" тілшісі.
Бұл туралы Mojnews агенттігі Иранның Душанбедегі елшісі Әлиреза Хагигианға сілтеме жасап хабарлады.
Елшінің айтуынша, Тәжікстан президентінің рәсімге қатысуы ел басшылығының Ислам революциясының көшбасшысына деген құрметін, екі мемлекет арасындағы достық қарым-қатынасты білдіреді.
Бұған дейін Иранның ұйымдастыру комитеті қоштасу рәсіміне 30-дан астам мемлекеттің ресми өкілдері келетінін хабарлаған болатын. Кейін бұл көрсеткіш шамамен 40 елге дейін ұлғайғаны мәлімделді. Сонымен қатар ұйымдастырушылар әлемнің 90-нан астам елінен діни, саяси және қоғам қайраткерлері қатысатынын хабарлады. Шетелдік делегациялардың толық тізімі әзірге жарияланған жоқ.
Өзбекстан Иранға делегацияны Олий Мәжіліс Заң шығару палатасының спикері Нуриддин Исмоиловтың басшылығымен жібереді. Ресейден қаралы іс-шараларға қауіпсіздік кеңесі төрағасының орынбасары Дмитрий Медведев қатысады. Ресей делегациясының құрамына СІМ өкілдері, орыс православие шіркеуінің дін қызметкерлері, суннит мүфтилері мен шиит ғалымдары да енеді.
Пәкістан делегациясын премьер-министр Шахбаз Шариф бастап барады. Қытай атынан Бүкілқытайлық халық өкілдері жиналысы тұрақты комитеті төрағасының орынбасары Хэ Вэй қатысады. Үндістаннан мемлекеттік сыртқы істер министрі Пабитра Маргерита мен Бихар штатының губернаторы Сайед Ата Хаснайн келеді.
Сонымен қатар Иран билігі ел тұрғындарын қоштасу рәсіміне жаппай қатысуға шақырды. Парламент төрағасы Мұхаммад-Бағер Ғалибаф ирандықтар «қаза тапқан көшбасшының қаны үшін әділ жазаны талап ететін халықтың үнін әлемге жеткізуі тиіс» екенін айтты.
Ұйымдастыру комитетінің өкілі Мұхаммад-Реза Миртаджеддини аятолланың қазасына кінәлілерді ұлттық және халықаралық деңгейде жауапқа тарту қаралы іс-шаралардың негізгі мақсаттарының бірі екенін мәлімдеді.
Қоштасу рәсімі 4 шілдеде Тегерандағы «Мосалла» кешенінде басталады. 5 шілдеде жаназа намазы оқылып, 6 шілдеде Тегеран көшелерінде қаралы шеру өтеді. Кейін Әли Хаменеидің денесі Құм қаласына жеткізіліп, 7 шілдеде қоштасу рәсімі жалғасады. 8 шілдеде қаралы іс-шаралар Ирактың Наджаф және Кербала қалаларында өтеді. Ал жерлеу рәсімі 9 шілдеде Мешхед қаласындағы имам Реза кесенесінде ұйымдастырылады.
Еске салайық, Әли Хаменеи 28 ақпанда АҚШ пен Израильдің Иранға жасаған әуе соққылары салдарынан қаза тапты. Алғашында оны наурыз айында жерлеу жоспарланғанымен, әскери іс-қимылдардың жалғасуына байланысты рәсім кейінге шегерілген.
