2025 жылғы 3 маусым күні Моңғолия астанасы Ұланбатырда бірнеше аптадан бері жалғасып жатқан жемқорлыққа қарсы наразылықтар аясында елдің премьер-министрі Лувсаннамсрайн Оюун-Эрдэнэ отставкаға кететінін мәлімдеді, деп хабарлайды “Адырна”.
Бұған дейін, парламент – Моңғолияның Ұлы мемлекеттік хуралы премьер-министрдің отставкасын жасырын дауыс беру арқылы қабылдаған еді.
Ақпарат агенттіктерінің хабарлауынша, Лувсаннамсрайн Оюун-Эрдэнэ жаңа премьер-министр тағайындалғанға дейін өз міндетін уақытша атқара береді. Заңға сәйкес, Моңғолияда жаңа үкімет басшысы 30 күн ішінде тағайындалуы тиіс.
Әлемдік агенттіктердің мәліметінше, Ұланбатырдағы наразылық шерулеріне қатысушылар Оюун-Эрдэнэнен 22 жастағы ұлының табыс көзін ашық жариялауды талап еткен. Оның қалыңдығы әлеуметтік желілерде қымбат сыйлықтардың суреттерін жариялаған: бриллиант жүзік, көлік және брендтік сөмке.
AFP агенттігі хабарлағандай, наразылыққа жастар белсенді түрде қатысуда. Олар «Отставка – бұл оңай» деген ұранмен шығып жатыр.
Лувсаннамсрайн Оюун-Эрдэнэ 2021 жылдан бері Моңғолия премьер-министрі қызметін атқарып келген. Ол өзіне тағылған барлық жемқорлық айыптауларын жоққа шығарып отыр.
