Астананың «Жеңіс» футбол клубы Қазақстан ұлттық құрамасының бұрынғы ойыншысы Александр Меркельмен келісімшартқа қол қойды. Бұл туралы клубтың баспасөз қызметі жариялады, деп хабарлайды “Адырна”.
«Александр Меркель 2015 жылдан бері Қазақстан құрамасының намысын қорғап, халықаралық жарыстарда ел атынан өнер көрсетіп келеді. Оның алаңды көре білу қабілеті, физикалық күші және стандартты жағдайларды орындаудағы жоғары шеберлігі “Жеңіс” клубының ойын стиліне жаңа серпін беретіні сөзсіз», - делінген хабарламада.
33 жастағы жартылай қорғаушы клуб сапына легионер ретінде тіркеледі, себебі Лиганың жаңа регламентіне сәйкес жергілікті ойыншылар деп тек ұлттық құрамада ойнауға құқығы бар футболшылар саналады. Қазіргі таңда Александрда ондай құқық жоқ, өйткені ол Германия азаматтығынан бас тартпаған. Ал Қазақстан заңнамасына сәйкес азаматтарға қос азаматтық алуға тыйым салынған.
Бұған дейін осы себеппен Қазақстанның хоккейден ұлттық құрамасы Канада, Швеция және Ресейден шыққан бірқатар натурализацияланған ойыншыларынан айырылған еді. Сонымен қатар кейбір қазақстандық хоккейшілер ресейлік төлқұжаттарын сақтап қалуды жөн көрді.
Александр Меркель – Алматы қаласының тумасы, Германияның «Штутгарт» және Италияның «Милан» клубтарының түлегі. «Милан» сапында Италия чемпионы атанды. Әр жылдары Италияның «Удинезе» мен «Пиза», Англияның «Уотфорд», Швейцарияның «Грассхоппер», Германияның «Бохум» және Австрияның «Адмира» клубтарында ойнады. 2018–2020 жылдары Нидерландтың «Хераклес» командасында өнер көрсетті. Кейін Түркия, Сауд Арабиясы, Иран және БАӘ клубтарында ойнады. Меркель Германияның әртүрлі жас деңгейіндегі жастар құрамаларында да ойнаған. 2015 жылы Қазақстан ұлттық құрамасы үшін ойнау туралы шешім қабылдады. Құрама сапында үш матч өткізді. Соңғы рет ұлттық құрама жейдесін 2019 жылы киген.
