استانانىڭ «جەڭىس» فۋتبول كلۋبى قازاقستان ۇلتتىق قۇراماسىنىڭ بۇرىنعى ويىنشىسى الەكساندر مەركەلمەن كەلىسىمشارتقا قول قويدى. بۇل تۋرالى كلۋبتىڭ ءباسپاسوز قىزمەتى جاريالادى، دەپ حابارلايدى “ادىرنا”.
«الەكساندر مەركەل 2015 جىلدان بەرى قازاقستان قۇراماسىنىڭ نامىسىن قورعاپ، حالىقارالىق جارىستاردا ەل اتىنان ونەر كورسەتىپ كەلەدى. ونىڭ الاڭدى كورە ءبىلۋ قابىلەتى، فيزيكالىق كۇشى جانە ستاندارتتى جاعدايلاردى ورىنداۋداعى جوعارى شەبەرلىگى “جەڭىس” كلۋبىنىڭ ويىن ستيلىنە جاڭا سەرپىن بەرەتىنى ءسوزسىز»، - دەلىنگەن حابارلامادا.
33 جاستاعى جارتىلاي قورعاۋشى كلۋب ساپىنا لەگيونەر رەتىندە تىركەلەدى، سەبەبى ليگانىڭ جاڭا رەگلامەنتىنە سايكەس جەرگىلىكتى ويىنشىلار دەپ تەك ۇلتتىق قۇرامادا ويناۋعا قۇقىعى بار فۋتبولشىلار سانالادى. قازىرگى تاڭدا الەكساندردا ونداي قۇقىق جوق، ويتكەنى ول گەرمانيا ازاماتتىعىنان باس تارتپاعان. ال قازاقستان زاڭناماسىنا سايكەس ازاماتتارعا قوس ازاماتتىق الۋعا تىيىم سالىنعان.
بۇعان دەيىن وسى سەبەپپەن قازاقستاننىڭ حوككەيدەن ۇلتتىق قۇراماسى كانادا، شۆەتسيا جانە رەسەيدەن شىققان بىرقاتار ناتۋراليزاتسيالانعان ويىنشىلارىنان ايىرىلعان ەدى. سونىمەن قاتار كەيبىر قازاقستاندىق حوككەيشىلەر رەسەيلىك تولقۇجاتتارىن ساقتاپ قالۋدى ءجون كوردى.
الەكساندر مەركەل – الماتى قالاسىنىڭ تۋماسى، گەرمانيانىڭ «شتۋتگارت» جانە يتاليانىڭ «ميلان» كلۋبتارىنىڭ تۇلەگى. «ميلان» ساپىندا يتاليا چەمپيونى اتاندى. ءار جىلدارى يتاليانىڭ «ۋدينەزە» مەن «پيزا»، انگليانىڭ «ۋوتفورد»، شۆەيتساريانىڭ «گراسسحوپپەر»، گەرمانيانىڭ «بوحۋم» جانە اۆستريانىڭ «ادميرا» كلۋبتارىندا وينادى. 2018–2020 جىلدارى نيدەرلاندتىڭ «حەراكلەس» كومانداسىندا ونەر كورسەتتى. كەيىن تۇركيا، ساۋد ارابياسى، يران جانە ءباا كلۋبتارىندا وينادى. مەركەل گەرمانيانىڭ ءارتۇرلى جاس دەڭگەيىندەگى جاستار قۇرامالارىندا دا ويناعان. 2015 جىلى قازاقستان ۇلتتىق قۇراماسى ءۇشىن ويناۋ تۋرالى شەشىم قابىلدادى. قۇراما ساپىندا ءۇش ماتچ وتكىزدى. سوڭعى رەت ۇلتتىق قۇراما جەيدەسىن 2019 جىلى كيگەن.
