ەگيپەتتەگى شارم-ەل-شەيح اۋەجايىندا جولاۋشىلارعا جارناما تاقتاسى قۇلاپ، قازاقستان ازاماتشاسى قازا تاپتى، دەپ حابارلايدى "ادىرنا" ۇلتتىق پورتالى.
17 مامىر كۇنى ەگيپەتتىڭ شارم-ەل-شەيح قالاسىنداعى اۋەجايدا جولاۋشىلاردىڭ ۇستىنە جارنامالىق قالقان قۇلاپ، قايعىلى وقيعا ورىن الدى. وقيعا سالدارىنان قازاقستان ازاماتشاسى قازا تاۋىپ، تاعى ەكى وتانداسىمىز جەڭىل جاراقات الدى.
بۇل تۋرالى قازاقستاننىڭ سىرتقى ىستەر مينيسترلىگى مالىمدەدى.
«شارم-ەل-شەيح اۋەجايىنىڭ ۇشۋ زالىندا رەيسكە وتىرعىزۋدى كۇتىپ وتىرعان جولاۋشىلاردىڭ ۇستىنە جارنامالىق تاقتا قۇلاپ كەتكەن. قايعىلى وقيعا سالدارىنان قازاقستان ازاماتشاسى قايتىس بولدى، تاعى ەكى ازاماتشامىز جەڭىل جاراقات الدى»، – دەلىنگەن ۆەدومستۆو حابارلاماسىندا.
مينيسترلىك مارقۇمنىڭ تۋىستارىمەن بايلانىس ورناتىپ، ولارعا بارلىق قاجەتتى كونسۋلدىق كومەك كورسەتىلىپ جاتقانىن ايتتى.
«جاراقات العان ەكى ازاماتشاعا ءتيىستى مەديتسينالىق كومەك كورسەتىلدى، قازىرگى تاڭدا ولاردىڭ ومىرىنە قاۋىپ ءتونىپ تۇرعان جوق. ەگيپەت تاراپى قازاقستان ازاماتشاسىنىڭ قازاسىنا بايلانىستى شىن كوڭىلدەن كوڭىل ايتتى. ەگيپەتتىڭ ازاماتتىق اۆياتسيا ءمينيسترى بۇل وقيعانى جەكە باقىلاۋىنا الىپ، وقيعا ورنىنا ارنايى كوميسسيا جىبەردى. قازىرگى ۋاقىتتا ءتيىستى تەرگەۋ جۇمىستارى جۇرگىزىلىپ جاتىر»، – دەپ مالىمدەدى قر ءسىم ءباسپاسوز قىزمەتى.
