برازيليالىق الەمگە ايگىلى فوتوگراف سەباستيان سالگادو قايتىس بولدى، دەپ حابارلايدى "ادىرنا" ۇلتتىق پورتالى Associated Press (AP) اگەنتتىگىنە سىلتەمە جاساپ.
قايعىلى حاباردى تۋرالى سالگادو مەن ونىڭ جۇبايى لەليا ۆانيك نەگىزىن قالاعان كوممەرتسيالىق ەمەس ەكولوگيالىق قور Terra ينستيتۋتى حابارلادى.
فوتوگراف 82 جاستا بولعان. ونىڭ ناقتى ءولىم سەبەبى ايتىلماعانىمەن، اگەنتتىكتىڭ مالىمەتىنشە، سالگادو 1990-جىلدارى بەزگەكپەن اۋىرعاننان كەيىن دەنساۋلىعىنا بايلانىستى ۇزاق ۋاقىت ءتۇرلى قيىندىقتاردى باستان وتكەرگەن. جاقىندا عانا فرانتسيانىڭ رەيمس قالاسىندا وتەتىن جۋرناليستەرمەن كەزدەسۋگە دەنساۋلىعىنىڭ ناشارلاۋىنا بايلانىستى قاتىسا الماعانى دا اتاپ ءوتىلدى.
Terra ينستيتۋتى سالگادونى «زاماناۋي داۋىردەگى ەڭ ۇزدىك فوتوگراف قانا ەمەس، الەمدى جانە ونىڭ قايشىلىقتارىن وبەكتيۆ ارقىلى اشا بىلگەن جان» دەپ اتاپ ءوتتى.
«ءبىز ونىڭ مۇراسىن جالعاستىرا بەرەمىز – جەردى كۇتىپ-باپتاپ، ادىلەتتىلىك پەن سۇلۋلىقتى ساقتايمىز. سەبەبى ول ولاردىڭ قالپىنا كەلۋى مۇمكىن ەكەنىنە شىن سەنەتىن»، – دەلىنگەن قوردىڭ مالىمدەمەسىندە.
برازيليا پرەزيدەنتى لۋيس يناسيۋ لۋلا دا سيلۆا سالگادونىڭ ەسىمىن ەرەكشە اتاپ، ونى ءوزىنىڭ ساياسي مانسابىندا ءاردايىم قولداعان ادام رەتىندە سيپاتتادى.
«ول – الەم جاساعان ەڭ ۇلى، ءتىپتى ەڭ ۇلى فوتوگرافتاردىڭ ءبىرى. ونىڭ الەمدەگى تەڭسىزدىككە دەگەن قارسىلىعى مەن شىندىقتى بەينەلەۋدەگى تاباندىلىعى – ادامزات ار-ۇجدانى ءۇشىن ءاردايىم وياتۋشى بەلگى بولدى»، – دەدى پرەزيدەنت.
سەباستيان سالگادو 1944 جىلى 8 اقپاندا برازيليانىڭ ميناس-جەرايس شتاتىندا دۇنيەگە كەلگەن. العاشىندا ەكونوميست بولىپ جۇمىس ىستەگەن، بىراق 1970-جىلدارى كاسىبىن تۇبەگەيلى وزگەرتىپ، فوتوگرافيا سالاسىنا بەت بۇردى. ونىڭ فوتوسۋرەتتەرى قارا-اق ءتۇستى، تەرەڭ ەموتسياعا تولى جانە الەۋمەتتىك تاقىرىپتاردى قوزعاۋىمەن ەرەكشەلەندى.
ەڭ تانىمال جوبالارى رەتىندە يندۋستريالدى ەڭبەك تۋرالى «Workers» («جۇمىسشىلار»، 1993) جانە سوعىس، كەدەيشىلىك پەن ەكولوگيالىق اپاتتار سالدارىنان ورىن العان حالىق قوزعالىستارى تۋرالى «Migrations» («كوشى-قون»، 2000) ايتىلادى.
1998 جىلى سەباستيان سالگادو برازيلياعا كەلگەنىندە ءوزىنىڭ بالالىق شاعى وتكەن وڭىرلەردىڭ بۇرىنعىداي قالىڭ ورمان مەن جان-جانۋارعا باي ەمەس، كەرىسىنشە، شولگە اينالعانىن كورىپ، ورماندى قايتادان جانداندىرۋعا بەل بۋدى. سالگادۋ مەن جۇبايى لەليا ۆانيك Terra ينستيتۋتىن قۇردى. بۇل ۇيىم برازيلياداعى تروپيكالىق ورمانداردىڭ سيرەك كەزدەسەتىن وسىمدىكتەرىن ساقتاۋ مەن قالپىنا كەلتىرۋدى ماقسات ەتتى.
جوبانىڭ ناتيجەسىندە 600 گەكتار اۋماققا اتلانت ورمانىنا ءتان 2,5 ميلليوننان استام اعاش ءتۇرى وتىرعىزىلدى. بۇل بۇرىن شولگە اينالعان ايماقتا بۇرىنعى كليماتتىق جاعداي مەن سۋ بالانسى قالپىنا كەلتىرىلدى. سونداي-اق، قالىپقا كەلتىرىلگەن اۋماقتا 172 قۇس ءتۇرى، 33 سۇتقورەكتى، 15 باۋىرىمەن جورعالاۋشى، 15 قوسمەكەندى، 293 وسىمدىك ءتۇرى تابيعي تىرشىلىگىن جانداندىرعان.
وسى جەرلەردى سالگادو برازيليا حالقىنا سىيعا تارتىپ، مۇندا ۇلتتىق پارك اشتى.
