تالدىقورعان قالاسىنداعى نازارباەۆ زياتكەرلىك مەكتەبى بەلسەندى ۇزاق ءومىر ءسۇرۋ ورتالىعىمەن ىنتىماقتاستىق تۋرالى مەموراندۋمعا قول قويدى.
2024 جىلى اشىلعان بۇل ورتالىق زەينەتكەرلەر ءۇشىن ناعىز ولجا بولدى، ولارعا سپورتپەن شۇعىلدانۋعا، ەكسكۋرسيالارعا قاتىسۋعا جانە ۇناعان حوببيلەرىمەن اينالاسۋعا مۇمكىندىك بەردى.
جاڭا مەموراندۋم شەڭبەرىندە الەۋمەتتىك جوبانى ىسكە اسىرۋ جوسپارلانۋدا، ول NIS-ءتىڭ 12 مامانداندىرىلعان ۇيىمدارمەن جانە قاۋىمداستىقتارمەن كوپجىلدىق ىنتىماقتاستىعىنىڭ جالعاسى بولادى.
NIS وقۋشىلارى ءبىلىم بەرۋ باستامالارىنا بەلسەندى قاتىسادى، اعىلشىن جانە قازاق تىلدەرىن ۇيرەتەدى، ماتەماتيكا، روبوتوتەحنيكا جانە كەراميكا ساباقتارىن وتكىزەدى. ولار سونداي-اق قايىرىمدىلىق اكتسيالارىن، جارمەڭكەلەردى، تانىمدىق بايقاۋلار مەن ۆيكتورينالاردى ۇيىمداستىرادى، بۇل ولاردىڭ جۇمىسىن پايدالى عانا ەمەس، سونىمەن قاتار قىزىقتى ەتەدى.
«ۇرپاقتار ساباقتاستى» جوباسىنا ەرەكشە نازار اۋدارىلادى، ونىڭ اياسىندا اعا بۋىن ءوز دانالىعى مەن بىلىمىمەن بولىسەدى، ال جاستار ولار ءۇشىن قىزىقتى كەزدەسۋلەر وتكىزەدى. بۇل ءوزارا ارەكەتتەسۋ ءوزارا تۇسىنىستىك پەن قولداۋدىڭ ەرەكشە اتموسفەراسىن جاسايدى.
«ءبىز ءبىلىمدى، تالانتتى جانە ىنتالى جاستارمەن ىنتىماقتاسۋعا وتە قۋانىشتىمىز. بۇگىن ولار ءبىز ءۇشىن كەراميكا، كيىز باسۋ، پازل جيناۋ جانە مايلىقتاردان ساندىك بۇيىمدار جاساۋ بويىنشا شەبەرلىك ساباقتارىن وتكىزدى. ۇرپاقتار اراسىنداعى بايلانىس ساقتالۋى ءتيىس»، - دەپ ءوز اسەرىمەن بەلسەندى ۇزاق ءومىر ءسۇرۋ ورتالىعىنىڭ قاتىسۋشىسى مناۆار ماحمۋتوۆا ءبولىستى.
وسىلايشا، نازارباەۆ زياتكەرلىك مەكتەبى مەن بەلسەندى ۇزاق ءومىر ءسۇرۋ ورتالىعى اراسىنداعى جاڭا ىنتىماقتاستىق بىرلەسكەن شىعارماشىلىق پەن ۇرپاقتار اراسىنداعى بايلانىستى نىعايتۋ ءۇشىن جاڭا كوكجيەكتەر اشادى، بۇل ءبىزدىڭ قوعامداعى جاستاردىڭ دا، قارتتاردىڭ دا ءومىرىن بايىتاتىنى ءسوزسىز.
