АҚШ-тың Теннесси штатында өлім жазасына кесілген 50 жастағы әйелге үкімді орындау кезінде улы инъекция жасалған. Алайда ол көз жұмбай, тірі қалған, деп хабарлайды «Адырна» тілшісі BBC-ге сілтеме жасап.
Теннесси штатының губернаторы Билл Ли өлім жазасына кесілген Криста Пайктың кешірім жасау туралы өтінішін қанағаттандырмады. Ал АҚШ Жоғарғы соты үкімнің орындалуын кейінге шегеру туралы өтінішті қабылдаған жоқ. Егер жаза орындалса, Пайк Теннесси штатында соңғы 200 жылдан астам уақыт ішінде өлім жазасына кесілген алғашқы әйел болады.
Эшли Селларс осы аптаның басында Теннесси штатындағы өлім жазасын күту камерасында отырған құрбысы Криста Пайкпен соңғы рет хат алмасқан. Пайк оған өлімге әкелетін инъекция арқылы жазалануды күтіп отырған кезде хабарлама жіберген.
Пайк Селларсқа жақындарының ешқайсысы сәрсенбі күні өтетін жазаны орындау рәсіміне қатыспағанын қалайтынын айтқан.
«Ол біздің мұны бастан өткергенімізді қаламайды», – дейді Селларс.
Селларс үшін өзі білетін мейірімді әрі қамқор жаннан 31 жыл бұрын жантүршігерлік қылмыс жасаған адамды көру қиын.
Еске салайық, 1995 жылы 18 жастағы Криста Пайк пен оның серіктесі Тадарил Шипп Пайктың 19 жастағы сыныптасы Коллин Слеммерді өлтірген. Бір жылдан кейін Пайк бірінші дәрежелі кісі өлтірді деп танылып, өлім жазасына кесілді. Ал қылмыс жасалған кезде 17 жаста болған Шипп шартты түрде мерзімінен бұрын босату мүмкіндігі қарастырылған өмір бойы бас бостандығынан айыру жазасын алды.
Криста Пайк АҚШ-тың қазіргі тарихындағы өлім жазасына кесілген ең жас әйел атанды. Іс бүкіл елде үлкен резонанс тудырды, өйткені Слеммердің мәйіті кеудесіне сатанизмнің символы саналатын пентаграмма ойып салынған күйде табылған.
Пайктың адвокаттары оған кешірім жасауды сұраған. Олардың айтуынша, ол қылмысты небәрі 18 жасында жасаған және анасының күйеулері тарапынан ұзақ жылдар бойы жыныстық зорлық-зомбылық көріп, психикалық денсаулығына байланысты қиындықтарға, соның ішінде биполярлық бұзылысқа шалдыққан.
Қорғаушылардың пікірінше, Пайкты ұстап тұрып, өлім жазасын орындау үшін медициналық төсекке байлау үкімді орындау тәртібін АҚШ Конституциясындағы «қатыгез әрі әдеттен тыс жазаға» тыйым салу қағидатына қайшы етеді.
