اقش-تىڭ تەننەسسي شتاتىندا ءولىم جازاسىنا كەسىلگەن 50 جاستاعى ايەلگە ۇكىمدى ورىنداۋ كەزىندە ۋلى ينەكتسيا جاسالعان. الايدا ول كوز جۇمباي، ءتىرى قالعان، دەپ حابارلايدى «ادىرنا» ءتىلشىسى BBC-گە سىلتەمە جاساپ.
تەننەسسي شتاتىنىڭ گۋبەرناتورى بيلل لي ءولىم جازاسىنا كەسىلگەن كريستا پايكتىڭ كەشىرىم جاساۋ تۋرالى ءوتىنىشىن قاناعاتتاندىرمادى. ال اقش جوعارعى سوتى ۇكىمنىڭ ورىندالۋىن كەيىنگە شەگەرۋ تۋرالى ءوتىنىشتى قابىلداعان جوق. ەگەر جازا ورىندالسا، پايك تەننەسسي شتاتىندا سوڭعى 200 جىلدان استام ۋاقىت ىشىندە ءولىم جازاسىنا كەسىلگەن العاشقى ايەل بولادى.
ەشلي سەللارس وسى اپتانىڭ باسىندا تەننەسسي شتاتىنداعى ءولىم جازاسىن كۇتۋ كامەراسىندا وتىرعان قۇربىسى كريستا پايكپەن سوڭعى رەت حات الماسقان. پايك وعان ولىمگە اكەلەتىن ينەكتسيا ارقىلى جازالانۋدى كۇتىپ وتىرعان كەزدە حابارلاما جىبەرگەن.
پايك سەللارسقا جاقىندارىنىڭ ەشقايسىسى سارسەنبى كۇنى وتەتىن جازانى ورىنداۋ راسىمىنە قاتىسپاعانىن قالايتىنىن ايتقان.
«ول ءبىزدىڭ مۇنى باستان وتكەرگەنىمىزدى قالامايدى»، – دەيدى سەللارس.
سەللارس ءۇشىن ءوزى بىلەتىن مەيىرىمدى ءارى قامقور جاننان 31 جىل بۇرىن جانتۇرشىگەرلىك قىلمىس جاساعان ادامدى كورۋ قيىن.
ەسكە سالايىق، 1995 جىلى 18 جاستاعى كريستا پايك پەن ونىڭ سەرىكتەسى تاداريل شيپپ پايكتىڭ 19 جاستاعى سىنىپتاسى كوللين سلەممەردى ولتىرگەن. ءبىر جىلدان كەيىن پايك ءبىرىنشى دارەجەلى كىسى ءولتىردى دەپ تانىلىپ، ءولىم جازاسىنا كەسىلدى. ال قىلمىس جاسالعان كەزدە 17 جاستا بولعان شيپپ شارتتى تۇردە مەرزىمىنەن بۇرىن بوساتۋ مۇمكىندىگى قاراستىرىلعان ءومىر بويى باس بوستاندىعىنان ايىرۋ جازاسىن الدى.
كريستا پايك اقش-تىڭ قازىرگى تاريحىنداعى ءولىم جازاسىنا كەسىلگەن ەڭ جاس ايەل اتاندى. ءىس بۇكىل ەلدە ۇلكەن رەزونانس تۋدىردى، ويتكەنى سلەممەردىڭ ءمايىتى كەۋدەسىنە ءساتانيزمنىڭ سيمۆولى سانالاتىن پەنتاگرامما ويىپ سالىنعان كۇيدە تابىلعان.
پايكتىڭ ادۆوكاتتارى وعان كەشىرىم جاساۋدى سۇراعان. ولاردىڭ ايتۋىنشا، ول قىلمىستى نەبارى 18 جاسىندا جاساعان جانە اناسىنىڭ كۇيەۋلەرى تاراپىنان ۇزاق جىلدار بويى جىنىستىق زورلىق-زومبىلىق كورىپ، پسيحيكالىق دەنساۋلىعىنا بايلانىستى قيىندىقتارعا، سونىڭ ىشىندە بيپوليارلىق بۇزىلىسقا شالدىققان.
قورعاۋشىلاردىڭ پىكىرىنشە، پايكتى ۇستاپ تۇرىپ، ءولىم جازاسىن ورىنداۋ ءۇشىن مەديتسينالىق توسەككە بايلاۋ ۇكىمدى ورىنداۋ ءتارتىبىن اقش كونستيتۋتسياسىنداعى «قاتىگەز ءارى ادەتتەن تىس جازاعا» تىيىم سالۋ قاعيداتىنا قايشى ەتەدى.
