رەسەيدەگى ءاربىر ونىنشى ساۋدا ورتالىعى «قىزىل ايماقتا» تۇر

253
Adyrna.kz Telegram
https://www.adyrna.kz/storage/uploads/3j7EQRC8H06tZieJeH1ZL041hfvEacvuxapsRjTH.jpg

رەسەيدەگى ساۋدا ورتالىقتارىنىڭ شامامەن 7–10 پايىزى بانكروتقا ۇشىراۋى مۇمكىن. بۇل تۋرالى «ريا نەدۆيجيموست» اگەنتتىگىنە ساۋدا جىلجىمايتىن مۇلكى جانە ريتەيل ساراپشىلارى قاۋىمداستىعىنىڭ تەڭ توراعاسى پاۆەل ليۋلين مالىمدەدى، دەپ حابارلايدى «ادىرنا» ءتىلشىسى.

«ساۋدا ورتالىقتارىنىڭ شامامەن جارتىسى نەسيە العان. نەسيە جۇكتەمەسىنەن بولەك، ولار ءوز نىساندارىن كۇتىپ-ۇستاۋعا دا قاراجات جۇمساۋى كەرەك. مەنىڭ ويىمشا، ولاردىڭ شامامەن 7–10 پايىزى قيىن جاعدايعا تاپ بولۋدىڭ الدىندا تۇر. ولار «قىزىل ايماقتا» ورنالاسقان جانە بانكروتقا ۇشىراۋى مۇمكىن. بۇل شامامەن 2 مىڭدى قۇرايتىن ساپالى ساۋدا ورتالىقتارىنا قاتىستى»، – دەدى ول.

پاۆەل ءليۋليننىڭ بولجامىنشا، قارجىلىق قيىندىققا تاپ بولعان ساۋدا ورتالىقتارى بىردەن بانكروتقا ۇشىرامايدى. ويتكەنى ولاردىڭ ەكونوميكالىق جاعدايىن جالعا الۋشىلارمەن جاسالعان ۇزاق مەرزىمدى كەلىسىمشارتتار قولداپ وتىر. مۇنداي كەلىسىمدەر، ادەتتە، بەس-جەتى جىلعا جاسالادى. الايدا كەلىسىمشارتتاردىڭ مەرزىمى اياقتالىپ، بوس تۇرعان ساۋدا الاڭدارىنىڭ ۇلەسى 50 پايىزعا جەتكەن كەزدە داعدارىس باستالۋى مۇمكىن.

بۇعان دەيىن اتەر ساراپشىسى الەنا وۆچيننيكوۆا رەسەيدە فۋد-كورتتاردىڭ جاپپاي جابىلا باستاعانىن ايتقان ەدى. 2026 جىلدىڭ العاشقى جارتىجىلدىعىندا جابىلعان مۇنداي نىسانداردىڭ سانى جاڭادان اشىلعانداردان ءۇش ەسە كوپ بولعان.

دەگەنمەن، ولاردىڭ كەيبىرى فۋد-حوللدارعا اينالدىرىلعان. ياعني، بىرىڭعاي ديزاينى مەن بەزەندىرىلۋى، ورتاق تۇجىرىمداماسى جانە ءىس-شارالار وتكىزۋگە ارنالعان الاڭى بار كەڭىستىكتەرگە وزگەرتىلگەن.

پىكىرلەر