25 جاستاعى IT-ازىرلەۋشى الەكساندر كاچكۋركين قازاقستاننان رەسەيگە دەپورتاتسيالاندى. ەلگە كەلگەن بويدا ول ۇشاقتىڭ ىشىندە ۇستالىپ، مەملەكەتكە وپاسىزدىق جاساۋ بابى بويىنشا قاماۋعا الىندى. بۇل تۋرالى «پەرۆىي وتدەل» قۇقىق قورعاۋ جوباسى جازدى، دەپ حابارلايدى «ادىرنا» ءتىلشىسى.
كاچكۋركين قىرىمدا تۋىپ-وسكەن. 2014 جىلى 14 جاسىندا رەسەي ازاماتتىعىن العان. قازاقستانعا ساياسي سەبەپتەرمەن كوشىپ كەلگەن. سوڭعى جىلدارى الماتىدا تۇرىپ، DevOps-ينجەنەر جانە ازىرلەۋشى بولىپ جۇمىس ىستەگەن. ونىڭ تاپسىرىس بەرۋشىلەرىنىڭ اراسىندا OpenAI اتتى امەريكالىق كومپانيا دا بولعان.
28 قاڭتاردا كاچكۋركينگە بىردەن ەكى اكىمشىلىك قۇقىقبۇزۋشىلىق بويىنشا ءىس قوزعالعان. ولار – جولدى بەلگىلەنبەگەن جەردەن كەسىپ ءوتۋ جانە جابىق عيماراتتا كاليان شەگۋ.
«قۇقىق قورعاۋشىلاردىڭ ايتۋىنشا، بۇل حاتتامالاردىڭ ەكەۋى دە قولدان جاسالعان. وسىدان كەيىن پوليتسيا سوتقا جۇگىنىپ، كاچكۋركيندى «قازاقستان رەسپۋبليكاسىنىڭ زاڭدارى مەن ەگەمەندىگىن قۇرمەتتەمەۋىنە بايلانىستى» دەپورتاتسيالاۋدى تالاپ ەتكەن. بارلىق پروتسەسس بىرنەشە ساعاتتىڭ ىشىندە جۇزەگە اسقان. ادەتتە مۇنداي راسىمدەر اپتالاپ، ءتىپتى ايلاپ سوزىلادى. كاچكۋركين شۇعىل تۇردە رەسەيگە جىبەرىلگەن. ۇشاق قونعان ساتتە ونى بىردەن ۇستاپ، سوتقا جەتكىزگەن. سوت جاس جىگىتتى قاماۋدا ۇستاۋ تۋرالى شەشىم شىعارعان»،-دەلىنگەن حابارلامادا.
رەسەيدە وعان ۋكرايناعا اقشا اۋداردى دەگەن ايىپپەن مەملەكەتكە وپاسىزدىق جاسادى دەگەن كىنا تاعىلىپ وتىر. رف قك-ءنىڭ 275-بابىنا سايكەس، كاچكۋركين 12 جىلدان 20 جىلعا دەيىن باس بوستاندىعىنان ايىرىلۋى نەمەسە ءومىر بويىنا سوتتالۋى مۇمكىن.
ەسكە سالايىق، 30 قاڭتاردا قازاقستاننىڭ رەسەيگە شەشەن بەلسەندىسى مانسۋر موۆلاەۆتى دا دەپورتاتسيالاۋدى جوسپارلاپ وتىرعانى بەلگىلى بولدى. قازىرگى ۋاقىتتا ول الماتىداعى تەرگەۋ يزولياتورىندا وتىر. وتكەن جىلدىڭ جەلتوقسانىندا قازاقستان بيلىگى وعان بوسقىن مارتەبەسىن بەرۋدەن باس تارتقان ەدى.
موۆلاەۆ شەشەنستان باسشىسى رامزان قادىروۆتى قاتاڭ سىناۋىمەن، سونداي-اق ادام قۇقىقتارىنىڭ بۇزىلۋى مەن ساياسي قۋعىن-سۇرگىندەرگە قارسى مالىمدەمەلەرىمەن تانىمال بولدى. ول رەسەيدە ەسىرتكىنىڭ زاڭسىز اينالىمى ءىسى بويىنشا بىرنەشە جىل تۇرمەدە وتىرعان. بوستاندىققا شىققان سوڭ ەلدەن كەتىپ، الدىمەن قىرعىزستاندى، كەيىن قازاقستاندى پانالاعان. 2025 جىلدىڭ مامىرىندا رف سۇراۋى بويىنشا قازاقستاندا ۇستالعان. رەسەيدە وعان ەكسترەميزمدى قارجىلاندىردى دەگەن ايىپ تاعىلىپ، فەدەرالدىق ىزدەۋ جاريالانعان.
