4 شىلدەدە ۆاشينگتوندا اقش تاۋەلسىزدىگىنىڭ 250 جىلدىعىنا ارنالعان مەرەكەلىك ءىس-شارالار قولايسىز اۋا رايىنا بايلانىستى توقتاتىلدى، دەپ حابارلايدى «ادىرنا» ءتىلشىسى AFP اگەنتتىگىنە سىلتەمە جاساپ.
اق ءۇي باسشىسى دونالد ترامپتىڭ جوسپارلانعان ءسوز سويلەۋىنە بىرنەشە ساعات قالعاندا قالا بيلىگى بارلىق شارانى توقتاتۋعا ءماجبۇر بولعان.
ءوز كەزەگىندە پرەزيدەنت Truth Social الەۋمەتتىك جەلىسىندە نايزاعاي باسىلعاننان كەيىن ءسوز سويلەيتىنىن مالىمدەپ، جينالعان جۇرتتى كۇتۋگە شاقىردى.
«بۇگىن سەنبى كەشى! تۇنگە دەيىن كىدىرۋگە تۋرا كەلسە دە، كوڭىل كوتەرەيىك»، – دەپ جازدى ول.
بۇعان دەيىن ۆاشينگتون اكىمدىگى دە اپتاپ ىستىققا بايلانىستى اقش-تىڭ تاۋەلسىزدىك كۇنىنە ارنالعان ءداستۇرلى جىل سايىنعى شەرۋدى وتكىزۋدەن باس تارتقان بولاتىن. قالادا اۋا تەمپەراتۋراسى 46 گرادۋستان اسقان.
ۇيىمداستىرۋشىلار كەلۋشىلەردى ۆاشينگتونداعى ۇلتتىق اللەيا اۋماعىنان شىعىپ، جاقىن ماڭداعى مۇراجايلار مەن مەملەكەتتىك عيماراتتارعا بارىپ پانالاۋعا شاقىردى.
AFP اگەنتتىگىنىڭ حابارلاۋىنشا، مەرەكەلىك شارالار وتكەن جەردە ۋاقىتشا تۇسىنىسپەۋشىلىك تۋىنداعان. كەيبىر كەلۋشىلەر پرەزيدەنت ترامپتى كورەمىز دەگەن ۇمىتپەن اۋماقتان كەتۋدەن باس تارتقان. سونىڭ سالدارىنان پوليتسيا قىزمەتكەرلەرى ولاردى اۋماقتان كۇشتەپ شىعارعان.
