فوتو: اقوردا
پرەزيدەنت قاسىم-جومارت توقاەۆ تمد مەملەكەتتەرى باسشىلارى كەڭەسىنىڭ وتىرىسىندا ءسوز سويلەپ، دوستاستىق اياسىنداعى سەنىمدى ديالوگ پەن ىنتىماقتاستىقتىڭ ماڭىزىن اتاپ ءوتتى، دەپ حابارلايدى "ادىرنا".
مەملەكەت باسشىسى جيىنعا قاتىسۋشىلارعا ءىلتيپات ءبىلدىرىپ، ءسامميتتى ويداعىداي ۇيىمداستىرعانى جانە قوناقجايلىق كورسەتكەنى ءۇشىن تۇرىكمەنستان پرەزيدەنتى سەردار بەردىمۇحامەدوۆكە العىس ايتتى.
"قازاقستان تۇرىكمەنستاننىڭ ۇيىمعا توراعالىق جاساعان كەزەڭىنىڭ ناتيجەلەرىن جانە تمد-نىڭ ورتاق كۇن ءتارتىبىن ىلگەرىلەتۋگە قوسقان ۇلەسىن جوعارى باعالايدى. وسىعان وراي، قۇرمەتتى ارىپتەس، ءسىزدىڭ جوعارى كاسىبي دەڭگەيدەگى جۇمىسىڭىزعا ريزاشىلىعىمدى بىلدىرەمىن. بۇگىنگى سامميت تاۋەلسىز مەملەكەتتەر دوستاستىعىنىڭ 35 جىلدىعىمەن تۇسپا-تۇس كەلىپ وتىر. وزدەرىڭىزگە ءمالىم، قازاقستان ۇيىمنىڭ باستاۋىندا تۇردى. 1991 جىلى قول قويىلعان الماتى دەكلاراتسياسى شىن مانىندە مەملەكەتتەرىمىزدىڭ تاريحىنداعى بەتبۇرىستى ءسات بولدى. تمد-نىڭ قۇرىلۋى پوستكەڭەستىك كەڭىستىكتەگى جاپپاي قاقتىعىستىڭ الدىن الدى. تمد-نىڭ بىرىكتىرۋشى ميسسياسى ەلدەرىمىز تاۋەلسىزدىك العان كەزەڭدە ايقىن كورىندى دەسەك، ارتىق ايتقانىمىز ەمەس. وداق قۇرامىنداعى ەلدەر ىرگە بولگەن كۇردەلى ساتتە تاريحي بايلانىستارىمىزدى ساقتاپ، مەملەكەتارالىق ىقپالداستىقتىڭ مۇلدەم جاڭا فورماتىن قۇردىق. وسى جىلداردا دوستاستىق ۇيىمى سەنىم مەن ىنتىماقتاستىقتى دارىپتەيتىن ءتيىمدى كوپجاقتى تەتىك رەتىندە بۇكىل الەمگە كەڭىنەن تانىلدى", – دەدى قاسىم-جومارت توقاەۆ.
پرەزيدەنت تمد-نىڭ ەڭ ۇلكەن بايلىعى حالىقتار دوستاستىعى، ورتاق مادەني جانە رۋحاني مۇرا ەكەنىن ايتتى.
"كوز الدىمىزدا حالىقارالىق قاتىناستاردىڭ جاڭا قۇرىلىمى قالىپتاسىپ كەلەدى. جاھاندىق ەكونوميكالىق بايلانىستار جۇيەسى كۇيرەي باستادى. تەحنولوگيالىق باسەكە كۇشەيدى، بەلگىسىزدىك بەلەڭ الىپ، الداعىنى بولجاۋ قيىنداي ءتۇستى. مۇنداي جاعدايدا تىكەلەي جانە سەنىمدى ديالوگ ءوربىتىپ، ءار مەملەكەتتىڭ مۇددەسىن ەسكەرەتىن ورتاق شەشىم تابۋ ەرەكشە ماڭىزدى. دوستاستىقتىڭ ۇدايى سۇرانىسقا يە ۇيىم بولۋىنىڭ بىردەن-ءبىر سەبەبى وسى دەپ ويلايمىن. مەرەيلى جىلدا الماتى دەكلاراتسياسىنداعى قاعيداتتارعا تاعى ءبىر نازار اۋدارىپ، ءجۇرىپ وتكەن جولىمىزدى قايتا زەردەلەۋدى جانە كەلەشەك مىندەتتەردى ايقىنداۋدى ۇسىنامىن", – دەدى مەملەكەت باسشىسى.
قاسىم-جومارت توقاەۆ قاراشا ايىندا الماتىدا قازاقستاننىڭ ستراتەگيالىق زەرتتەۋلەر ينستيتۋتىنىڭ ۇيىمداستىرۋىمەن الماتى دەكلاراتسياسىنىڭ قابىلدانعانىنا 35 جىل تولۋىنا ارنالعان حالىقارالىق كونفەرەنتسيا وتەتىنىن مالىمدەدى.
"تمد مەملەكەتتەرىنىڭ عالىمدارىن، قۇقىقتانۋشىلارىن، تاريحشىلارى مەن ساراپشىلارىن كونفەرەنتسيا جۇمىسىنا بەلسەندى تۇردە قاتىسۋعا شاقىرامىز", – دەدى پرەزيدەنت.
