قازاقستان مەن اقش اراسىندا تىكەلەي اۋە رەيستەرىن ىسكە قوسۋ ازىرگە مۇمكىن بولماي وتىر، دەپ حابارلايدى "ادىرنا" ۇلتتىق پورتالى.
بۇل تۋرالى Air Astana اۋە كومپانياسىنىڭ باسشىسى مالىمدەدى.
ونىڭ ايتۋىنشا، اقش باعىتىنا تىكەلەي رەيس اشۋ ءۇشىن بىرقاتار قاتاڭ تالاپتاردى ورىنداۋ قاجەت. سونىڭ ىشىندە نەگىزگى ماسەلە — قولايلى ءارى قولجەتىمدى اۋە مارشرۋتىنىڭ بولماۋى.
كومپانيا باسشىسى اقش-قا ۇشۋ رۇقساتىن الۋ باسقا حالىقارالىق باعىتتارعا قاراعاندا الدەقايدا كۇردەلى ەكەنىن اتاپ ءوتتى. امەريكالىق تاراپ قاۋىپسىزدىك، لوگيستيكا جانە مارشرۋتتاۋ تالاپتارىن كۇشەيتكەن.
سونداي-اق ول پوليارلىق مارشرۋتتىڭ ماڭىزىن ەرەكشە اتاپ ءوتتى. الايدا بۇل باعىتتى پايدالانۋ تەك تەحنيكالىق مۇمكىندىكتەرگە عانا ەمەس، وزگە ەلدەردىڭ اۋە كەڭىستىگى ارقىلى ۇشۋعا بەرىلەتىن رۇقساتتارعا دا بايلانىستى.
اۋە كومپانيا باسشىسىنىڭ سوزىنشە، قازىرگى تاڭدا ناقتى مەرزىم ايتۋ قيىن، سەبەبى بۇل ماسەلە تەك اۋە كومپانياسىنا عانا تاۋەلدى ەمەس. ماسەلەنىڭ شەشىلۋىنە رەسەيگە قارسى ەنگىزىلگەن سانكتسيالار مەن ونىڭ اۋە كەڭىستىگىن پايدالانۋعا قويىلعان شەكتەۋلەر دە اسەر ەتىپ وتىر. وسى فاكتورلار ساقتالعان جاعدايدا، تىكەلەي رەيستەردىڭ ىسكە قوسىلۋ مەرزىمى كەيىنگە شەگەرىلۋى مۇمكىن.
