اقش ۇلتتىق قاۋىپسىزدىك اگەنتتىگىنىڭ ىشكى جەلىسى ىستەن شىقتى

352
Adyrna.kz Telegram
https://www.adyrna.kz/storage/uploads/ApSIxqTZg4AKWIEGdyUm7IoNi1X4hUNn2bQiGtkb.jpg

فوتو: AP Photo/Patrick Semansky, File

اقش ۇلتتىق قاۋىپسىزدىك اگەنتتىگىنىڭ (NSA) قۇپيا اقپاراتتى ساقتاۋ جانە الماسۋ ءۇشىن پايدالانىلاتىن ىشكى جەلىسىندە تەحنيكالىق اقاۋ تىركەلدى. بۇل تۋرالى CBS News جازدى، دەپ حابارلايدى "ادىرنا".

تەلەارنا مالىمەتىنشە، وقيعا تۋرالى اقپاراتتى جاعدايدان حاباردار بىرنەشە امەريكالىق شەنەۋنىك راستاعان. NSA Net دەپ اتالاتىن جەلى اگەنتتىكتىڭ ىشكى قاۋىپسىز بايلانىسىن قامتاماسىز ەتىپ، قۇپيا دەرەكتەرمەن الماسۋ ءۇشىن قولدانىلادى.

ۇلتتىق قاۋىپسىزدىك اگەنتتىگىنىڭ وكىلى جۇيەدە جوسپارلى تەحنيكالىق قىزمەت كورسەتۋ كەزىندە ۋاقىتشا ىركىلىستەر بولعانىن مالىمدەدى. ونىڭ ايتۋىنشا، كەيبىر ىشكى جۇيەلەردىڭ جۇمىسى بۇزىلعانىمەن، نەگىزگى مىندەتتەردى ورىنداۋعا قاجەتتى ينفراقۇرىلىم شتاتتىق رەجيمدە جۇمىس ىستەپ تۇر. سونداي-اق بۇل جاعداي اگەنتتىكتىڭ ۇلتتىق قاۋىپسىزدىكتى قامتاماسىز ەتۋ مۇمكىندىگىنە اسەر ەتپەگەن.

ۆەدومستۆو وكىلى اگەنتتىك ينفراقۇرىلىمى بىرنەشە دەڭگەيلى رەزەرۆتىك جۇيەمەن جابدىقتالعانىن اتاپ ءوتتى. بۇل جوسپارلى جاڭارتۋ جۇمىستارى نەمەسە كۇتپەگەن اقاۋلار كەزىندە قىزمەتتىڭ ۇزدىكسىز جۇمىس ىستەۋىنە مۇمكىندىك بەرەدى.

CBS News دەرەككوزدەرىنىڭ حابارلاۋىنشا، ازىرگە جەلىدەگى اقاۋدىڭ كيبەرشابۋىل سالدارىنان بولعانىن راستايتىن ەشقانداي دالەل جوق. ەكى دەرەككوز ماسەلە جۇيەلەردى جوسپارلى جاڭارتۋ كەزىندە تۋىنداعانىن ايتقانىمەن، وقيعانىڭ ناقتى سەبەپتەرى ءالى تولىق انىقتالماعان.

اقاۋدىڭ سالدارىنان اگەنتتىك مەريلەند شتاتىنداعى فورت-ميد اسكەري بازاسىندا ورنالاسقان شتاب-پاتەرىندە قىزمەتكەرلەردىڭ جۇمىس كەستەسىن وزگەرتۋگە ءماجبۇر بولعان. شۇعىل ەمەس مىندەتتەردى ورىندايتىن ماماندار ءۇشىن جۇمىسقا كەلۋدىڭ بولەك كەستەسى ەنگىزىلگەن.

دەرەككوزدەردىڭ سوزىنشە، مۇنداي شەشىم قىزمەتكەرلەردىڭ ءبىر ۋاقىتتا جۇيەگە جاپپاي قوسىلۋىنا جول بەرمەۋ ماقساتىندا قابىلدانعان. وسىلايشا، مامانداردىڭ جۇمىسقا كەلۋ ۋاقىتى كەزەڭ-كەزەڭىمەن بولىنگەن.

سونىمەن بىرگە فورت-ميد اسكەري كەشەنىنىڭ جالپى جۇمىسىنا ايتارلىقتاي اسەر بولماعان. ونداعى وتكىزۋ پۋنكتتەرى مەن باسقا دا قىزمەتتەر ادەتتەگى رەجيمدە جۇمىسىن جالعاستىرعان. سەبەبى ۇلتتىق قاۋىپسىزدىك اگەنتتىگى كەشەن اۋماعىنداعى باسقا قۇرىلىمداردان بولەك، ءوز قىزمەتكەرلەرىنە قاتىستى جەكە جۇمىس ءتارتىبىن بەلگىلەي الادى.

اقپارات كوزدەرىنىڭ مالىمەتىنشە، اگەنتتىكتىڭ كەيبىر جۇمىس پروتسەستەرى اقش-تىڭ وزگە ايماقتارىندا ورنالاسقان بولىمشەلەرىنە اۋىستىرىلعان.

ازىرگە NSA Net جەلىسىنىڭ ناقتى قانشا ۋاقىت جۇمىس ىستەمەگەنى جانە ونىڭ تولىق قالپىنا كەلۋ مەرزىمى تۋرالى اقپارات جاريالانعان جوق.

ايتا كەتەيىك، اقش ۇلتتىق قاۋىپسىزدىك اگەنتتىگى شەتەلدىك بارلاۋ اقپاراتىن جيناۋ جانە تالداۋ، كيبەرقاۋىپتەردى انىقتاۋ مەن ولاردىڭ الدىن الۋ، سونداي-اق مەملەكەتتىك كوممۋنيكاتسيالاردى قورعاۋ مىندەتتەرىن اتقارادى.

بۇل وقيعا اقش-تا بىرقاتار ءىرى سەرۆيستەردە تەحنيكالىق ىركىلىستەر تىركەلگەن كەزەڭدە بولىپ وتىر. دۇيسەنبى كۇنى Chase, Bank of America جانە Wells Fargo بانكتەرىنىڭ جۇيەلەرىندە، سونداي-اق United Airlines اۋە كومپانياسىنىڭ رەيستەردى باسقارۋ قىزمەتىندە اقاۋلار بايقالعان.

بۇعان دەيىن اقش فەدەرالدىق ازاماتتىق اۆياتسيا باسقارماسىنىڭ شەشىمىمەن ەل اۋماعىنداعى اۋە رەيستەرى ۋاقىتشا توقتاتىلعان بولاتىن.

پىكىرلەر