پاكىستان اقش پەن ءيزرايلدىڭ يرانعا قارسى سوعىسىن توقتاتۋ ماقساتىنداعى كەلىسسوزدەرگە الاڭ ۇسىنۋعا دايىن. بۇل تۋرالى 24 ناۋرىزدا ەل پرەمەر-ءمينيسترى شاحباز شاريف مالىمدەدى، دەپ حابارلايدى «ادىرنا» ءتىلشىسى.
ول يسلامابادتىڭ تاياۋ شىعىستاعى سوعىستى توقتاتۋ ماقساتىندا جۇرگىزىلىپ جاتقان ديالوگتى تولىق قۇپتايتىنىن جەتكىزدى.
«اقش پەن يران كەلىسىم بەرگەن جاعدايدا، پاكىستان مازمۇندى ءارى تۇپكىلىكتى كەلىسسوزدەردى وتكىزۋگە جاردەمدەسۋ ءۇشىن قابىلداۋشى تاراپ بولۋعا دايىن جانە مۇنى ءوزى ءۇشىن ۇلكەن مارتەبە سانايدى. بۇل كەلىسسوزدەر جالعاسىپ جاتقان قاقتىعىستى جان-جاقتى رەتتەۋگە باعىتتالادى»، – دەپ جازدى شاحباز شاريف.
Tasnim اگەنتتىگىنىڭ حابارلاۋىنشا، دۇيسەنبى كۇنى يران پرەزيدەنتى ماسۋد پەزەشكيان شاريفپەن تەلەفون ارقىلى سويلەسىپ، تەگەراننىڭ وڭىرلىك ىنتىماقتاستىققا بەيىلدىلىگىن راستاعان.
بۇعان دەيىن اقش پرەزيدەنتى دونالد ترامپ ۆاشينگتون يرانداعى «قاجەتتى ادامدارمەن» جاعدايدى تالقىلاپ جاتقانىن جانە ولاردىڭ «كەلىسىمگە كەلۋگە مۇددەلى ەكەنىن» جەتكىزگەن ەدى. ترامپتىڭ سوزىنشە، امەريكالىق تاراپتان كەلىسسوزدەرگە اقش مەملەكەتتىك حاتشىسى ماركو رۋبيو مەن ۆيتسە-پرەزيدەنت دجەيمس دەۆيد ۆەنس قاتىسۋدا.
اقش كوشباسشىسى سونداي-اق تەگەران يادرولىق قارۋ ازىرلەۋدەن باس تارتۋعا دايىن ەكەنىن مالىمدەدى، بىراق وقيعالاردى الدىن الا بولجاماۋعا شاقىردى.
ەسكە سالايىق، پرەزيدەنت قاسىم-جومارت توقاەۆ 21 ناۋرىزدا تاياۋ شىعىس كەلىسسوزىنە تۇركىستاندى الاڭ رەتىندە ۇسىنعان بولاتىن. ول قازاقستاننىڭ قاقتىعىس ايماعىنا جاقىن وڭىردە ورنالاسقانىن اتاپ ءوتىپ، ەلدىڭ بەيبىت ۇستانىمدى قولدايتىنىن جەتكىزگەن.
