اقش قورعانىس ءمينيسترى پيت حەگسەت ءباسپاسوز ءماسليحاتىندا ءوزىن قىزمەتىنەن بوساتۋ ءراسىمىن باستاۋ تۋرالى ۇسىنىستى سىنعا الدى، دەپ حابارلايدى "ادىرنا" ۇلتتىق پورتالى ۆۆس-گە سىلتەپ.
ول بۇل ارەكەتتى «ساياسي قويىلىم» جانە قوعام نازارىن اۋدارۋعا باعىتتالعان قادام دەپ باعالادى.
حەگسەت دۇيسەنبى كۇنى ءوزىن قىزمەتىنەن بوساتۋ ءراسىمىن باستاۋعا باستاماشى بولعان رەسپۋبليكاشىل كونگرەسسمەن توماس ءماسسيدىڭ ارەكەتىنە نارازىلىق ءبىلدىردى. ءمينيستردىڭ ايتۋىنشا، بۇل جاۋاپكەرشىلىككە تارتۋ ارەكەتى ەمەس، كونگرەسسمەننىڭ جەكە وكپەسى مەن مەنمەندىگىنەن تۋىنداعان باستاما.
«بۇل – ءوزىن جارنامالاۋ امالى»، – دەدى پەنتاگون باسشىسى. سونداي-اق ول زاڭدى اسكەري وپەراتسيالاردى جۇرگىزگەنى ءۇشىن بۇعان دەيىن ەشبىر قورعانىس ءمينيسترىن قىزمەتىنەن بوساتۋ ءراسىمى باستالماعانىن العا تارتتى.
حەگسەتتىڭ پىكىرىنشە، مۇنداي باستاما اقش-تىڭ قارسىلاستارىنا ۇگىت-ناسيحات تۇرعىسىنان ارتىقشىلىق بەرەدى. ول مۇنى پاتريوتيزم ەمەس، ەل مۇددەسىنە نۇقسان كەلتىرەتىن ارەكەت دەپ اتادى.
ءباسپاسوز ءماسليحاتىندا مينيستر اقش-تىڭ يرانعا قارسى جانە ەسىرتكى ساۋداسىمەن اينالىسادى دەگەن كۇدىككە ىلىنگەن تۇلعالارعا قاتىستى اسكەري وپەراتسيالارىنىڭ زاڭدى نەگىزى بار ەكەنىن تاعى دا ايتتى.
حەگسەت يرانعا قارسى جۇرگىزىلگەن «ەپيكالىق قاھار» وپەراتسياسىن اقش پەن ءيزرايلدىڭ تاريحي اسكەري جەڭىسى دەپ باعالادى. ونىڭ سوزىنشە، يراننىڭ اسكەري-تەڭىز كۇشتەرىنە، اۋە كۇشتەرىنە جانە يادرولىق نىساندارىنا جاسالعان سوققىلاردان كەيىن ەلدىڭ قارۋلى كۇشتەرى ايتارلىقتاي السىرەگەن.
مينيستر ۆەنەسۋەلادا نيكولاس مادۋرونى بيلىكتەن كەتىرۋگە باعىتتالعان اسكەري وپەراتسيانى دا ترامپ اكىمشىلىگىنىڭ جەتىستىكتەرىنىڭ ءبىرى رەتىندە اتادى.
