ۇلىبريتانياداعى Cornwall Wildlife Trust قايىرىمدىلىق ۇيىمى كورنۋولل گرافتىعىنداعى لۋ ارالىنىڭ باسقارۋشىسى قىزمەتىنە ۇمىتكەرلەر قابىلداپ جاتىر، دەپ حابارلايدى "ادىرنا".
بۇل تۋرالى شەتەلدىك باق بەتتەرىندە جاريالاندى.
ماماندار قورىق اۋماعىنداعى تابيعاتتى قورعاۋعا، قىزمەتكەرلەر مەن ەرىكتىلەردىڭ جۇمىسىن ۇيلەستىرۋگە جانە كەلۋشىلەردى قابىلداۋدى ۇيىمداستىرۋعا جاۋاپتى بولادى.
ۇيىم بۇل قىزمەتكە ءبىر اداممەن قاتار، مىندەتتەردى ءوزارا ءبولىسىپ اتقاراتىن ەكى ۇمىتكەردى دە قابىلداۋعا دايىن. ماسەلەن، ەرلى-زايىپتىلار نەمەسە دوستار بىرگە ءوتىنىش بەرە الادى. مۇنداي جاعدايدا جۇمىس ۋاقىتى، مىندەتتەرى مەن جالاقىسى جەكە كەلىسىم بويىنشا بەلگىلەنەدى.
ارال باسقارۋشىسىنىڭ جىلدىق جالاقىسى 32 569–39 923 فۋنت ستەرلينگ ارالىعىندا. بۇل شامامەن 19,6–24 ميلليون تەڭگەگە تەڭ. قىزمەتكەرگە ارالدان باسپانا بەرىلەدى. وندا جۇبايىمەن نەمەسە بىرگە تۇراتىن سەرىگىمەن تۇرۋعا مۇمكىندىك بار.
سونىمەن قاتار جۇمىس بەرۋشى يكەمدى جۇمىس كەستەسىن، جىلىنا 25–30 كۇن اقىلى دەمالىستى، پسيحولوگيالىق قولداۋ باعدارلاماسىن جانە زەينەتاقى جوسپارىن ۇسىنادى.
سۇحباتتىڭ العاشقى كەزەڭى 30 قاراشا باستالاتىن اپتادا وتەدى دەپ جوسپارلانعان. ال ارال اۋماعىنداعى كەلەسى كەزەڭ جەلتوقسان ايىنىڭ باسىندا ۇيىمداستىرىلادى. دەگەنمەن مەرزىمدەر وزگەرۋى مۇمكىن. ۇيىم لايىقتى ۇمىتكەر تاپقان جاعدايدا ۆاكانسيانى مەرزىمىنەن بۇرىن جابۋعا قۇقىلى.
