اقش پرەزيدەنتى دونالد ترامپ فەدەرالدىق تەرگەۋ بيۋروسى (فبر) Nvidia كومپانياسىنىڭ باسشىسى دجەنسەن حۋانگقا قاتىستى جاعدايدى تەكسەرىپ جاتقانىن ايتتى، دەپ حابارلايدى "ادىرنا" ۇلتتىق پورتالى ۆۆس-گە سىلتەپ.
وعان قىتاي ارنايى قىزمەتتەرىمەن بايلانىسى بار دەگەن كۇدىككە ىلىنگەن ايەلمەن كوڭىل جاراستىردى دەگەن اقپارات تاراعان.
ترامپ دۇيسەنبىدە جۋرناليستەرگە دجەنسەن حۋانگپەن وسى ماسەلەگە بايلانىستى سويلەسكەنىن ايتقان. ونىڭ سوزىنشە، اڭگىمە بارىسىندا كاسىپكەردەن ايەلدىڭ قىتاي بارلاۋ قىزمەتىنە قاتىسى بار ەكەنىن بىلگەن-بىلمەگەنىن سۇراعان.
«ول ايەلدىڭ تىڭشى ەكەنىن بىلمەگەنىن ايتتى. مەن وعان تولىق سەنەمىن»، – دەدى اقش پرەزيدەنتى.
بۇعان دەيىن امەريكالىق باسىلىمدار اقش ارنايى قىزمەتتەرى حۋانگتىڭ ەليس حۋانگ ەسىمدى ايەلمەن نەكەدەن تىس قارىم-قاتىناستا بولعانىن انىقتاعانى تۋرالى اقپارات تاراتقان. ايەل قىتاي بارلاۋ قىزمەتىمەن بايلانىسى بار دەگەن كۇدىككە ىلىنگەن. ول سينگاپۋردا ورنالاسقان، دەرەكتەر ورتالىقتارىن باسقاراتىن ءارى Nvidia چيپتەرىن ساتىپ الاتىن Megaspeed كومپانياسىمەن بايلانىستى ەكەنى ايتىلعان.
جەكسەنبىدە دجەنسەن حۋانگ جۇبايىنا وپاسىزدىق جاساعانىن مويىنداعان. وسىدان كەيىن Nvidia كومپانياسى جاعدايعا بايلانىستى تاۋەلسىز تەكسەرۋ جۇرگىزە باستاعان. كومپانيا وكىلدەرى ازىرگە قۇپيا اقپاراتتىڭ سىرتقا تاراعانى نەمەسە اقش ۇلتتىق قاۋىپسىزدىگىنە نۇقسان كەلگەنى تۋرالى دەرەك جوق ەكەنىن مالىمدەگەن.
ال قىتاي بيلىگى ەلدىڭ حۋانگقا قاتىستى بارلاۋ وپەراتسيالارىن جۇرگىزگەنىن جوققا شىعاردى. قىتاي سىرتقى ىستەر مينيسترلىگى مۇنداي ايىپتاۋلاردى نەگىزسىز ءارى قىتايدىڭ بەدەلىنە نۇقسان كەلتىرۋگە باعىتتالعان مالىمدەمە دەپ اتادى.
ترامپ فبر بۇل ماسەلەنى زەرتتەپ جاتقانىن راستاعانىمەن، تەرگەۋدىڭ قاشان باستالعانىن جانە وزگە دە مالىمەتتەردى ناقتىلامادى. فبر BBC ارناسىنىڭ ساۋالىنا تۇسىنىكتەمە بەرۋدەن باس تارتقان.
سونىمەن قاتار اتالعان جانجالدان كەيىن Nvidia اكتسيالارىنىڭ قۇنى كۇرت تومەندەپ، كومپانيانىڭ نارىقتىق كاپيتاليزاتسياسى جۇزدەگەن ميلليارد دوللارعا قىسقارعانى حابارلاندى.
