سي تسزينپين تۇركىمەنستانعا ەكى تاراپقا دا قولايلى ۋاقىتتا رەسمي ساپارمەن بارۋعا دايىن ەكەنىن مالىمدەدى، دەپ حابارلايدى "ادىرنا" ۇلتتىق پورتالى.
قىتاي باسشىسىنىڭ سەردار بەردىمۇحامەدوۆكە جولداعان حاتىن 20 مامىر كۇنى تۇركىمەنستاننىڭ مەملەكەتتىك TDH اگەنتتىگى جاريالادى.
«شاقىرۋىڭىز ءۇشىن العىس بىلدىرەمىن جانە ەكى تاراپقا دا ىڭعايلى ۋاقىتتا تۇركىمەنستانعا بارۋعا دايىنمىن. بۇل ماسەلە بويىنشا ەكى ەلدىڭ سىرتقى ىستەر مينيسترلىكتەرى تىعىز بايلانىستا جۇمىس ىستەي الادى»، – دەلىنگەن جولداۋدا.
قىتاي باسشىسى سي تسزينپين قىتاي مەن تۇركىمەنستان اراسىنداعى جان-جاقتى ستراتەگيالىق سەرىكتەستىكتى دامىتۋعا ەرەكشە ءمان بەرەتىنىن ايتىپ، سەردار بەردىمۇحامەدوۆپەن تۇراقتى جۇمىس بايلانىسىن جالعاستىرۋعا نيەتتى ەكەنىن جەتكىزدى. قىتاي توراعاسىنىڭ سوزىنشە، بەيجىڭ تۇركىمەنستانمەن ءتۇرلى سالاداعى ءوزارا ءتيىمدى ىنتىماقتاستىقتى تەرەڭدەتۋدى قولدايدى. سونىمەن قاتار ەكى ەل اراسىنداعى ىنتىماقتاستىق كوميتەتى ۇسىنىستاردى زەردەلەپ، ءتيىستى جاعداي جاسالعان كەزدە ولاردى جۇزەگە اسىرا الاتىنى ايتىلعان.
«قىتاي تاراپى تۇركىمەنستانمەن بىرلەسىپ، ىنتىماقتاستىقتىڭ جاڭا جارقىن ۇلگىلەرىن قالىپتاستىرۋعا جانە قىتاي مەن تۇركىمەنستاننىڭ ورتاق تاعدىر قاۋىمداستىعىنىڭ مازمۇنىن ۇزدىكسىز تولىقتىرۋعا دايىن»، – دەلىنگەن حاتتا.
ازىرگە سي تسزينپينتىڭ تۇركىمەنستانعا ناقتى قاي كۇنى باراتىنى جاريالانعان جوق.
