بۇدان الدىن كورشى ەلدەردەن كەشىرىم سۇراعان يران پرەزيدەنتى ماسۋد پەزەشكيان ەندى تەگەران تاياۋ شىعىستاعى اقش اسكەري بازالارىنا جاۋاپ سوققىلارىن جالعاستىراتىنىن مالىمدەدى. ونىڭ ايتۋىنشا، بۇل بازالاردان يران اۋماعىنا شابۋىلدار جاسالىپ جاتىر. بۇل تۋرالى يران باسشىسى شاحباز شاريف, پاكىستان پرەمەر-مينيسترىمەن تەلەفون ارقىلى سويلەسۋ بارىسىندا ايتقان، دەپ حابارلايدى "ادىرنا".
پەزەشكياننىڭ سوزىنشە، يران ايماقتاعى مەملەكەتتەرگە قارسى شابۋىل جاساۋدى نەمەسە ولارمەن قاقتىعىسقا بارۋدى ماقسات ەتپەيدى. ونىڭ ايتۋىنشا، ەل تەك ءوزىن-ءوزى قورعاۋ قۇقىعى اياسىندا ارەكەت ەتەدى جانە يران اۋماعىنا سوققى جاسالعان اسكەري نىساندارعا عانا جاۋاپ بەرەدى.
سونداي-اق يران پرەزيدەنتى كەيبىر جاعدايلاردا شابۋىل جاساۋشىلار كورشى مەملەكەتتەردىڭ اۋماعىن پايدالانىپ، يراننىڭ ينفراقۇرىلىمىنا، قوعامدىق ورىندارى مەن اۋرۋحانالارىنا سوققى جاسايتىنىن ايتتى. ونىڭ پىكىرىنشە، مۇنداي ارەكەتتەر بەيبىت تۇرعىنداردىڭ قازا بولۋىنا جانە نىسانداردىڭ قيراۋىنا اكەلەدى. سوندىقتان يرانعا شابۋىل جاسالعان بازالار جاۋاپ سوققىلارىنىڭ نىساناسىنا اينالاتىنىن اتاپ ءوتتى.
يران پرەزيدەنتى بۇدان الدىن توڭىرەكتەگى ەلدەرگە شابۋىل جاساعانى ءۇشىن كەشىرىم سۇراعان بولاتىن. ء«بىزدىڭ ايماقتاعى مەملەكەتتەرمەن جاۋلىعىمىز جوق. كورشىلەرىمىزدەن كەشىرىم سۇرايمىن. ەگەر يرانعا قارسى شابۋىل بولماسا، ءبىز تاراپىنان كورشى ەلدەرگە قارسى ەشقانداي اسكەري ارەكەت جاسالمايدى»، – دەگەن ەدى پەزەشكيان.
