اقش يراننان ورمۋز بۇعازىنداعى كوممەرتسيالىق كەمەلەرگە جاسالاتىن شابۋىلداردى توقتاتاتىنىن جاريا تۇردە مالىمدەۋدى تالاپ ەتتى. Reuters اگەنتتىگىنىڭ حابارلاۋىنشا، ۆاشينگتون بۇل تالاپتىڭ ورىندالۋىنا 11 شىلدەنى سوڭعى مەرزىم رەتىندە بەلگىلەگەن، دەپ حابارلايدى “ادىرنا”.
ەگەر تەگەران تالاپتى ورىنداماسا، وعان اسكەري جانە ەكونوميكالىق سيپاتتاعى قاتاڭ شارالار قولدانىلۋى مۇمكىن ەكەنى ەسكەرتىلدى.
امەريكا تاراپى يراننىڭ كوممەرتسيالىق كەمەلەرگە شابۋىلداردى توقتاتاتىنىن رەسمي تۇردە جاريالاۋىن، ورمۋز بۇعازى ارقىلى وتەتىن بارلىق تەڭىز باعىتتارىنىڭ اشىق ەكەنىن جانە حالىقارالىق كەمە قاتىناسى ەركىن ءارى ەشقانداي تولەمسىز جۇزەگە اساتىنىن راستاۋىن تالاپ ەتىپ وتىر.
كۇتىلىپ وتىرعانداي، بۇل ماسەلە يراننىڭ سىرتقى ىستەر ءمينيسترى ابباس اراگچي مەن وماننىڭ سىرتقى ىستەر ءمينيسترى اراسىنداعى ماسكات قالاسىندا وتەتىن كەلىسسوزدەردەن كەيىن جاريا ەتىلۋى مۇمكىن.
Axios باسىلىمىنىڭ مالىمەتىنشە، اقش ءدال وسى كۇندى تەگەراننىڭ رەسمي ۇستانىمىن ءبىلدىرۋى ءتيىس سوڭعى مەرزىم رەتىندە قاراستىرىپ وتىر.
ۆاشينگتون سوڭعى كۇندەرى جۇرگىزىلگەن كەلىسسوزدەردى ناتيجەلى دەپ باعالاعانىمەن، يران ماۋسىم ايىندا قول قويىلعان ءوزارا تۇسىنىستىك تۋرالى مەموراندۋمنىڭ تالاپتارىن بۇزىپ، ورمۋز بۇعازىنداعى كەمەلەرگە شابۋىلداردى جالعاستىردى دەپ ەسەپتەيدى. اقش شەنەۋنىكتەرىنىڭ ايتۋىنشا، يران بۇل ارەكەتتەردى ەلدەگى جەكەلەگەن قۇرىلىمداردىڭ ءىسى دەپ تۇسىندىرگەن.
سونىمەن قاتار اقش يراننان جوعارى دەڭگەيدە بايىتىلعان ۋران قورىن تاپسىرۋدى تالاپ ەتۋدى جالعاستىرىپ وتىر. ۆاشينگتوننىڭ پىكىرىنشە، بۇل ماسەلە شەشىلمەيىنشە، جاڭا يادرولىق كەلىسىمگە قول جەتكىزۋ مۇمكىن ەمەس.
ەسكە سالساق، 8 شىلدەدە وتكەن ناتو سامميتىندە اقش پرەزيدەنتى دونالد ترامپ يرانمەن جاسالعان ءبىتىمنىڭ اياقتالعانىن مالىمدەگەن بولاتىن. كەيىن اقش اسكەرى يران اۋماعىنا قوسىمشا سوققىلار جاساپ، مۇنى ورمۋز بۇعازىنداعى كەمە قاتىناسىنىڭ قاۋىپسىزدىگىن قامتاماسىز ەتۋ ماقساتىمەن بايلانىستىردى.
ءوز كەزەگىندە يراننىڭ يسلام رەۆوليۋتسياسى ساقشىلار كورپۋسى كۋۆەيت پەن باحرەيندەگى اقش اسكەري بازالارىنا سوققى جاساعانىن حابارلادى. تەگەران ۆاشينگتون اسكەري وپەراتسيانى جالعاستىرعان جاعدايدا وڭىردەگى باسقا دا امەريكالىق نىساندارعا شابۋىل جاساۋعا دايىن ەكەنىن مالىمدەدى.
ايماقتاعى شيەلەنىستىڭ كۇشەيۋى الەمدىك مۇناي باعاسىنىڭ وسۋىنە دە اسەر ەتىپ وتىر.
