اقش پەن يران وكىلدەرى بۇۇ باس اسسامبلەياسىنىڭ 81-سەسسياسى اياسىندا نيۋ-يوركتە كەلىسسوز وتكىزدى. 22 قىركۇيەكتە وتكەن كەزدەسۋ بىرنەشە ايدان بەرگى ەكى ەل اراسىنداعى العاشقى تىكەلەي كەلىسسوزدەردىڭ ءبىرى بولدى.بۇل تۋرالى اقش پرەزيدەنتى دونالد ترامپ مالىمدەدى، دەپ حابارلايدى "ادىرنا".
كەزدەسۋ شامامەن ءۇش ساعاتقا سوزىلعان. اقش پرەزيدەنتى دونالد ترامپ كەلىسسوزدەردى «وتە ناتيجەلى» دەپ باعالادى.
اقش دەلەگاتسياسىنىڭ قۇرامىندا ترامپتىڭ ارنايى وكىلدەرى ستيۆ ۋيتكوفف پەن دجارەد كۋشنەر بولدى. يران تاراپىنان كەلىسسوزدەرگە سىرتقى ىستەر ءمينيسترى ابباس اراگچي قاتىستى. «The New York Times» باسىلىمىنىڭ مالىمەتىنشە، كەزدەسۋدى وتكىزۋگە كاتار مەن پاكىستان اراعايىندىق جاساعان.
ترامپتىڭ ارنايى وكىلى ستيۆ ۋيتكوفف كەلىسسوزدەردەن كەيىن تاراپتار اراسىندا ۇزاق تالقىلاۋ جۇرگىزىلگەنىن مالىمدەدى. ونىڭ ايتۋىنشا، دەلدالدار كۇنى بويى اقش پەن يران وكىلدەرىنىڭ اراسىندا بايلانىس ورناتۋعا كومەكتەسكەن.
«كەلىسسوزدەردىڭ بۇل راۋندى ءساتتى اياقتالدى. ونىڭ كونسترۋكتيۆتى ءارى بولاشاعى بار ناتيجەگە اكەلەدى دەپ ۇمىتتەنەمىز»، – دەپ جازدى ۋيتكوفف X الەۋمەتتىك جەلىسىندە.
يران ورمۋز بۇعازىنا قاتىستى شارتتارىن ۇسىندى
يراننىڭ مەملەكەتتىك اقپارات قۇرالدارىنىڭ حابارلاۋىنشا، كەلىسسوز بارىسىندا تەگەران ۆاشينگتونعا ورمۋز بۇعازى ارقىلى كەمە قاتىناسىن قايتا باستاۋعا قاتىستى ءوز شارتتارىن جەتكىزگەن.
ولاردىڭ قاتارىندا اقش-تىڭ تەڭىز بلوكاداسىن دەرەۋ توقتاتۋى، سانكتسيالار سالدارىنان بۇعاتتالعان يران اكتيۆتەرىن بوساتۋ جانە اسكەري ءىس-قيمىلداردى توقتاتۋ تالاپتارى بار.
ورمۋز بۇعازى – الەمدىك مۇناي تاسىمالى ءۇشىن ستراتەگيالىق ماڭىزى بار تەڭىز جولدارىنىڭ ءبىرى. سوندىقتان بۇعاز ماڭىنداعى كەز كەلگەن شيەلەنىس حالىقارالىق ەنەرگەتيكالىق نارىقتارعا اسەر ەتۋى مۇمكىن.
ترامپ يرانعا قاتاڭ ەسكەرتۋ جاسادى
كەلىسسوزدەر الدىندا دونالد ترامپ بۇۇ باس اسسامبلەياسىندا سويلەگەن سوزىندە يرانعا قاتىستى قاتاڭ مالىمدەمە جاسادى.
اقش پرەزيدەنتى ۆاشينگتوننىڭ الدىندا ەكى جول تۇرعانىن ايتىپ، يرانمەن كەلىسىمگە كەلۋ نەمەسە ەلگە قارسى اسكەري شارا قولدانۋ مۇمكىندىگىن اتاپ ءوتتى. ترامپ يران كەلىسىمگە كەلمەگەن جاعدايدا يسلام رەسپۋبليكاسىن «تەز ارادا جويۋى» مۇمكىن ەكەنىن مالىمدەدى.
سوعان قاراماستان، سول كۇنى اقش پەن يران وكىلدەرى بىرنەشە ساعات بويى كەلىسسوز جۇرگىزدى. ترامپ كەيىن پارسى شىعاناعى ەلدەرىنىڭ كوشباسشىلارىمەن كەزدەسۋدە يرانمەن كەلىسىمگە قول جەتكىزۋ ءۇشىن «ۇلكەن سەرپىن» بار ەكەنىن ايتتى.
قازىرگى تاڭدا تاراپتاردىڭ ناقتى قانداي كەلىسىمگە كەلگەنى تۋرالى تولىق اقپارات جاريالانعان جوق. الايدا نيۋ-يوركتەگى كەزدەسۋ اقش پەن يران اراسىنداعى ديپلوماتيالىق بايلانىستاردىڭ قايتا جاندانۋىنا مۇمكىندىك بەرەتىن ماڭىزدى قادام رەتىندە قاراستىرىلىپ وتىر.
