اقش پرەزيدەنتى دجو بايدەن قازاقستان رەسپۋبليكاسىنداعى توتەنشە جانە وكىلەتتى ەلشى قىزمەتىنە دانيەل روزەنبليۋمنىڭ كانديداتۋراسىن ۇسىندى. بۇل تۋرالى اق ءۇي سايتىندا جاريالاندى، دەپ حابارلايدى “ادىرنا” ۇلتتىق پورتالى.
"پرەزيدەنت دجو بايدەن ءوز اكىمشىلىگىنىڭ نەگىزگى باسشىلارى رەتىندە مىنا تۇلعالاردى تاعايىنداۋ نيەتىن مالىمدەدى: دەنيەل ن. روزەنبليۋم - قازاقستان رەسپۋبليكاسىنداعى توتەنشە جانە وكىلەتتى ەلشى لاۋازىمىنا ۇمىتكەر", - دەلىنگەن حابارلامادا.
روزەنبليۋم 2019 جىلدان بەرى اقش-تىڭ وزبەكستانداعى ەلشىسى قىزمەتىن اتقارعان.
2014 جىلعى شىلدەدەن 2018 جىلعى شىلدەگە دەيىن وڭتۇستىك جانە ورتالىق ازيا ىستەرى بويىنشا مەملەكەتتىك دەپارتامەنت بيۋروسىندا مەملەكەتتىك حاتشى كومەكشىسىنىڭ ورىنباسارى قىزمەتىن اتقارعان.
اقش-تىڭ قازاقستانداعى ەلشىسى ۋيليام موزەر ديپلوماتيالىق ميسسياسىن 2021 جىلدىڭ قىركۇيەگىندە اياقتادى. بىلتىر قازاننان باستاپ اقش ەلشىسى مىندەتىن دجۋدي كۋو اتقارىپ كەلەدى.
”ادىرنا” ۇلتتىق پورتالى
