اقش-تىڭ فلوريدا شتاتىندا تۇراتىن سكوتت ۋينتەرس OpenAI كومپانياسى مەن ونىڭ باس ديرەكتورى سەم التمانعا قارسى سوتقا تالاپ ارىز بەردى، دەپ حابارلايدى "ادىرنا" ءتىلشىسى.
CBS مالىمەتىنشە، ول ChatGPT بەرگەن دەنساۋلىققا قاتىستى كەڭەستەردىڭ سالدارىنان دارىگەرگە دەر كەزىندە قارالماي، كەيىن وكپە ارتەرياسىنىڭ جاپپاي ترومبوەمبولياسىن وتكەرگەنىن مالىمدەدى.
ەر ادام تالاپ ارىزدا 2025 جىلى باس اينالۋ مەن قان قىسىمىنىڭ ءجيى كوتەرىلۋىنە بايلانىستى ChatGPT-4o-دان كەڭەس سۇراعانىن جازعان. ونىڭ سوزىنشە، چات-بوت بۇل بەلگىلەردى قاۋىپتى دەپ باعالاماي، ۇيدە قالىپ، ارقاسى شالقايعان كرەسلودا كوبىرەك دەمالۋعا كەڭەس بەرگەن. سونداي-اق جاعداي تەك وسىنداي بەلگىلەر سەگىز-ون رەت قايتالانعان جاعدايدا عانا الاڭداۋعا سەبەپ بولاتىنىن ايتقان.
تالاپكەر وسى كەڭەستەرگە سۇيەنگەن. الايدا بىرنەشە اپتادان كەيىن، 2025 جىلدىڭ شىلدەسىندە، ول وكپە ارتەرياسىنىڭ جاپپاي ترومبوەمبولياسىن وتكەرىپ، ومىرىنە قاۋىپ تونگەن.
ۋينتەرستىڭ ايتۋىنشا، ونى ەمدەگەن دارىگەرلەردىڭ ءبىرى ترومبوەمبوليانىڭ دامۋىن ChatGPT ۇسىنعان ۇزاق ۋاقىت قوزعالىسسىز وتىرۋمەن بايلانىستىرعان.
تالاپكەردىڭ ادۆوكاتتارى ماسەلە تەك قاتە كەڭەستە ەمەس، چات-بوتتىڭ ءوزىن كاسىبي دارىگەر سەكىلدى سەنىمدى تۇردە ۇستاۋىندا دەپ ەسەپتەيدى. ولاردىڭ پىكىرىنشە، ChatGPT جالپى اقپارات بەرۋدىڭ ورنىنا مەديتسينالىق باعالاۋ جاساپ، ەمدەۋ جونىندە ۇسىنىس ايتىپ، ليتسەنزياسىز مەديتسينالىق قىزمەت كورسەتكەن.
سونىمەن قاتار تالاپكەرلەر OpenAI-دى پايدالانۋشىنىڭ ءدىني سەنىمدەرىن جاۋاپتارىندا ورىنسىز قولداندى دەپ ايىپتادى. تالاپ ارىزدا اۋرۋحاناعا جەتكىزىلەر الدىندا ۋينتەرس شات تۇسىنداعى اۋىرسىنۋعا بايلانىستى قايتادان ChatGPT-دەن كەڭەس سۇراعانى كورسەتىلگەن. جاۋاپتا چات-بوت: «قۇداي ءسىزدىڭ دەنەڭىزدى ۇنەمى سىرقاتتاناتىنداي ەتىپ جاراتقان جوق» دەگەن مازمۇندا جاۋاپ بەرگەن. كەيىن بۇل اۋىرسىنۋ وكپە ارتەرياسى ترومبوەمبولياسىنىڭ العاشقى بەلگىلەرىنىڭ ءبىرى بولعانى انىقتالعان.
OpenAI ايىپتاۋلارمەن كەلىسپەيتىنىن حابارلادى. كومپانيا وكىلى دريۋ پۋساتەري ChatGPT دارىگەردىڭ ورنىن باسۋعا ارنالماعانىن جانە ونى دياگنوز قويۋ نەمەسە ەم تاعايىنداۋ قۇرالى رەتىندە پايدالانۋعا بولمايتىنىن ايتتى.
ءىس بويىنشا سوڭعى شەشىمدى سوت شىعارادى.
