قازاقستان پرەزيدەنتى قاسىم-جومارت توقاەۆ اقش پەن يران يسلام رەسپۋبليكاسى اراسىندا قول جەتكىزىلگەن كەلىسىمگە قاتىستى ءوز پىكىرىن ءبىلدىردى. بۇل تۋرالى مەملەكەت باسشىسى ءوزىنىڭ X الەۋمەتتىك جەلىسىندەگى پاراقشاسىندا جازدى، دەپ حابارلايدى "ادىرنا".
"حالىقارالىق احۋال كۇردەلى قازىرگى كەزەڭدە ايماق جانە الەمدىك قوعامداستىق ءۇشىن مۇنداي كەلىسىمنىڭ ماڭىزى زور. ءبىز تاراپتاردىڭ ساياسي ەرىك-جىگەرىن جوعارى باعالايمىز. بۇل ءوزارا سەنىمدى قالپىنا كەلتىرىپ، ەكى جاققا دا ءتيىمدى شەشىم قابىلداۋعا مۇمكىندىك بەردى. سىن ساتتە باتىل ارەكەت ەتىپ، ستراتەگيالىق كورەگەندىك تانىتقان اقش پرەزيدەنتى دونالد ترامپتىڭ كوشباسشىلىعىن ەرەكشە اتاپ وتەمىز. سونىمەن قاتار يران يسلام رەسپۋبليكاسى جەتەكشىلىگىنىڭ كونسترۋكتيۆتى ۇستانىمىن قۋاتتايمىز. قازاقستان وسى بەيبىت كەلىسىمگە قول قويۋ تاياۋ شىعىستا جانە ودان تىسقارى جەرلەردە بەيبىتشىلىك پەن تۇراقتىلىقتىڭ بەرىك نەگىزىن قالايتىنىنا سەنىم ارتادى", – دەپ جازدى مەملەكەت باسشىسى X پاراقشاسىندا.
14 ماۋسىمدا اقش پەن يران اراسىندا بەيبىت كەلىسىمگە قول جەتكىزىلگەنى بەلگىلى بولدى. تاراپتار كەلىسىمگە رەسمي تۇردە 19 ماۋسىمدا قول قويۋدى جوسپارلاپ وتىر.
اقش پرەزيدەنتى دونالد ترامپ بۇل تۋرالى Truth Social الەۋمەتتىك جەلىسىندەگى پاراقشاسىندا مالىمدەدى.
"يران يسلام رەسپۋبليكاسىمەن كەلىسىم جاسالدى. بارشاڭىزدى قۇتتىقتايمىن! وسى شەشىمگە سايكەس ورمۋز بۇعازى ارقىلى ەركىن كەمە قاتىناسىنا تولىق رۇقسات بەرىلەدى. سونىمەن قاتار اقش-تىڭ اسكەري-تەڭىز بلوكاداسىن دەرەۋ توقتاتۋعا تاپسىرما بەردىم. الەم ەلدەرىنىڭ كەمەلەرى ەركىن قوزعالا الادى. مۇناي تاسىمالى قالىپتى رەجيمدە جالعاسسىن", – دەپ جازدى ترامپ.
