2027 جىلى اقش-تاعى Discovery Park of America مۋزەي-پاركىندە شىڭعىس حان ءداۋىرى مەن موڭعول حالقىنىڭ تۇرمىس-تىرشىلىگىنە ارنالعان اۋقىمدى كورمە وتەدى. بۇل تۋرالى Asia Russia Daily جازدى، دەپ حابارلايدى «ادىرنا» ءتىلشىسى.
شامامەن 4000 شارشى فۋتتى قامتيتىن مۋزەي كەڭىستىگى ورتاعاسىرلىق موڭعوليانىڭ ەرەكشە اتموسفەراسىنا اينالماق. «شىڭعىس حان: يمپەريادان تىس» اتتى كورمە 2027 جىلدىڭ 15 ماۋسىمىندا ەسىگىن ايقارا اشىپ، 7 قىركۇيەككە دەيىن جالعاسادى. ال 14 ماۋسىم كۇنى باق وكىلدەرى مەن ارنايى قوناقتارعا ارنالعان الدىن الا كورسەتىلىم ۇيىمداستىرىلادى.
«بۇل كورمە – جاڭالىقتار مەن اشىلىمدارعا تولى جوبا. ول كەلۋشىلەرگە موڭعول مادەنيەتىن ونەر، مۋزىكا، داستۇرلەر، تۇرمىستىق زاتتار مەن تاريحي وقيعالار ارقىلى تانىپ-بىلۋگە مۇمكىندىك بەرەدى. كورمەدەن شىققان ءاربىر ادام وسى ءوڭىر مەن تاريحي كەزەڭ تۋرالى بۇرىنعىدان الدەقايدا تەرەڭ تۇسىنىك قالىپتاستىرادى دەپ سەنەمىن»،– دەدى Discovery Park of America مۋزەي-پاركىنىڭ پرەزيدەنتى ءارى باس ديرەكتورى سكوتت ۋيليامس.
اۋقىمدى ەكسپوزيتسيا ءۇش بىردەي 53 فۋتتىق جۇك كولىگىمەن جەتكىزىلەدى، ال ونى ورناتۋ جۇمىستارى شامامەن ەكى اپتاعا سوزىلادى. جوبا اياسىندا 300-دەن استام تۇپنۇسقا جادىگەر، اسەرلى دەكوراتسيالار، يممەرسيۆتى پروەكتسيالار، دەرەكتى فيلمدەر، ينتەراكتيۆتى ەكراندار، رولدىك ايماقتار جانە تابيعي كولەمدە جاسالعان ءداستۇرلى موڭعول كيىز ءۇيى ۇسىنىلادى.
كورمەنىڭ باستى ەرەكشەلىكتەرىنىڭ ءبىرى – ءداستۇردى ساقتاۋشى ونەر يەلەرىنىڭ قاتىسۋى. موڭعول ارتىستەرى ساياباق اۋماعىندا تۇرىپ، كۇن سايىن ونەر كورسەتەدى. كەلۋشىلەر ءداستۇرلى مۋزىكالىق اسپاپتاردىڭ اۋەنىن، كومەيمەن ءان ايتۋ ونەرىن تىڭداپ، ۇلتتىق كيىم، حالىقتىق قولونەر جانە قازىرگى موڭعولياداعى ءومىر تۋرالى اڭگىمەلەيتىن شەبەرلەرمەن جۇزدەسە الادى.
ەكسپوزيتسيا قوناقتاردى موڭعول دالاسىنان باستاپ، يمپەريا نەگىزىن قالاۋشىنىڭ ورداسى، ەجەلگى قاراقورىم قالاسى، ۇلى جىبەك جولى جانە قۇبىلاي حان سارايىنا دەيىنگى تاريحي جولمەن جەتەلەيدى.
كورمەدە ەۋرازيانىڭ كوپعاسىرلىق تاريحىن قامتيتىن باي جادىگەرلەر توپتاماسى قويىلادى. ولاردىڭ قاتارىندا قارۋ-جاراق، ساۋىت-سايمان، دۋلىعالار، كەراميكالىق بۇيىمدار، ءدىني جادىگەرلەر، ات ابزەلدەرى مەن تۇرمىستىق زاتتار بار.
كورمەنىڭ ەڭ قۇندى ەكسپوناتتارىنىڭ قاتارىندا شىڭعىس حان داۋىرىنە جاتاتىن شامامەن 1225 جىلعى قىلىش، 1260 جىلعى موڭعول سەمسەرى، XIII–XIV عاسىرلار توعىسىنداعى كۇردەلى ساداق پەن اتتى اسكەردىڭ ساۋىت-سايمانى، سونداي-اق 1328 جىلى جاسالعان سيرەك قولا اتىس قارۋى بار.
ەكسپوزيتسيانىڭ اۆتورى ءارى Dino Don Inc. كومپانياسىنىڭ پرەزيدەنتى دون لەزسەم بولسا، كۋراتورلارى – سميتسون ينستيتۋتىنىڭ عالىمى دوكتور ۋيليام فيتسحيۋ مەن كولۋمبيا ۋنيۆەرسيتەتىنىڭ پروفەسسورى دوكتور مورريس روسسابي. جوبا ۇلان-باتىر قالاسىنداعى ءبىلىم، مادەنيەت جانە عىلىم مينيسترلىگىمەن بىرلەسىپ ازىرلەنگەن.
اۋقىمدى جوبا تاريحي مۇرا مەن زاماناۋي مۋزەي تەحنولوگيالارىن ۇشتاستىرا وتىرىپ، امەريكالىق كورەرمەندەرگە ايگىلى قولباسشى تۇلعاسى مەن ورتالىق ازيانىڭ باي مادەني مۇراسىنا جاڭاشا كوزقاراسپەن قاراۋعا مۇمكىندىك بەرەدى.
