شانحاي ىنتىماقتاستىق ۇيىمىنا مۇشە مەملەكەتتەر يرانداعى جاعدايعا بايلانىستى ورتاق مالىمدەمە جاسادى، دەپ حابارلايدى “ادىرنا” ۇلتتىق پورتالى.
شىۇ تاياۋ شىعىستاعى كۇش قولدانۋدى جانە يرانعا قارسى اسكەري سوققىلاردى جول بەرۋگە بولمايتىن ارەكەت دەپ اتادى.
ۇيىمعا مۇشە ەلدەر ايماقتاعى قايشىلىقتاردى تەك بەيبىت جولمەن رەتتەۋدى قولدايتىنىن جەتكىزدى.
“شىۇ-عا مۇشە مەملەكەتتەر يراننىڭ ەگەمەندىگى، قاۋىپسىزدىگى مەن اۋماقتىق تۇتاستىعىن قامتاماسىز ەتۋ قاجەتتىگىن اتاپ وتەدى. بارلىق تاراپتاردى ۇستامدىلىق تانىتۋعا جانە جاعدايدى ۋشىقتىرۋى مۇمكىن ارەكەتتەردەن باس تارتۋعا شاقىرادى”، – دەلىنگەن ۇيىمنىڭ حابارلاماسىندا.
سونىمەن قاتار شىۇ بۇۇ شۇعىل تۇردە حالىقارالىق بەيبىتشىلىك پەن قاۋىپسىزدىككە تونگەن قاتەردىڭ الدىن الۋ ءۇشىن ناقتى شارالار قابىلداۋعا ۇندەدى.
ۇيىم وكىلدەرى شابۋىل سالدارىنان قازا تاپقانداردىڭ وتباسىلارىنا كوڭىل ايتىپ، يران ۇكىمەتى مەن حالقىنا قولداۋ ءبىلدىردى.
شىۇ-عا بەلارۋس، يران، قازاقستان، قىتاي، قىرعىزستان، وزبەكستان، ءۇندىستان، پاكىستان، رەسەي جانە تاجىكستان ەلدەرى مۇشە.
