مەملەكەت باسشىسى قاسىم-جومارت توقاەۆ قازاقستاندىقتاردى مادەنيەتتى، سابىرلى بولىپ، داڭعازا مەن ايقاي-شۋعا جول بەرمەۋگە شاقىردى. بۇل تۋرالى پرەزيدەنت بۇگىن VI دۇنيەجۇزىلىك كوشپەندىلەر ويىندارى جەڭىمپازدارىن ماراپاتتاۋ راسىمىندە ايتتى، دەپ حابارلايدى “ادىرنا”.
استانادا، تاۋەلسىزدىك سارايىندا وتكەن جيىندا پرەزيدەنت توقاەۆ بۇكىل الەم تۇركى حالىقتارىنا كوز تىگىپ وتىرعانىن العا تارتىپ، بۇل جارىستى بىرلەسە دامىتۋعا شاقىردى.
VI دۇنيەجۇزىلىك كوشپەندىلەر ويىندارى 1-6 قىركۇيەك ارالىعىندا قىرعىزستاننىڭ ىستىقكول وبلىسىندا وتكەن ەدى. 100-دەن استام ەلدەن سپورتشىلار قاتىسقان بۇل سايىستا قازاقستان 74 مەدالمەن، ونىڭ ىشىندە 32 التىن جۇلدەمەن ءبىرىنشى ورىن العان بولاتىن.
"قازاقستان وسى ورتاق ىسكە بەلسەنە اتسالىسۋعا قاشاندا دايىن. ەكى باۋىرلاس ەلگە اتا-بابالارىمىزدىڭ قالدىرىپ كەتكەن ەڭ قۇندى وسيەتى: بۇل – ءوزارا قۇرمەت جانە ماڭگى دوستىق. وسى دانالىقتى ۇمىتۋعا ەشقانداي حاقىمىز جوق. ءبىز – ۇلى دالا وركەنيەتىنىڭ زاڭدى مۇراگەرىنىڭ ءبىرىمىز. باتىر بابالارىمىز ۇلان-عايىر جەردى بىزگە امانات ەتتى. سالت-ءداستۇرىمىزدى، رۋحاني قۇندىلىقتارىمىزدى مۇرا ەتىپ قالدىردى. قاستەرلى قازىنانى كوزدىڭ قاراشىعىنداي ساقتاپ، جاس بۋىنعا تابىستاۋ – ورتاق پارىزىمىز. وسى رۋحتى بورىشىمىزدى وركەنيەتتى، مادەنيەتتى تۇردە، ابىرويمەن جۇزەگە اسىرۋىمىز قاجەت", – دەدى ول.
پرەزيدەنت قازاقستان ماقساتى – بيىك، جوسپارى – ايقىن، بولاشاققا سەنىممەن قارايتىن وزىق ويلى ۇلت رەتىندە ءاردايىم العا قاراي ۇمتىلىپ كەلە جاتقانىن ايتتى.
ء"بىز، سونىڭ ىشىندە ۇلتتىق سپورتپەن اينالىساتىن جاستار، باسقا دا سپورتشىلار، مەملەكەتتىك قىزمەتشىلەر مەن كاسىپكەرلەر، دارىگەرلەر مەن ۇستازدار، ستۋدەنتتەر مەن عالىمدار، جۇمىسشىلار مەن باسقارۋشىلار، اسكەري قىزمەتكەرلەر مەن مەكەمە قىزمەتشىلەرى – ءبارىمىز مادەنيەتتى، سابىرلى بولىپ، داڭعازا مەن ايقاي-شۋعا جول بەرمەۋىمىز قاجەت. سوندا عانا قازاق حالقى تولىققاندى وركەنيەتتى قوعام بولادى", – دەپ اتاپ ءوتتى مەملەكەت باسشىسى.
