فوتو: ريا «نوۆوستي»
پەتەربۋرگتە رەسەي پرەزيدەنتى ۆلاديمير پۋتين يران سىرتقى ىستەر ءمينيسترى ابباس اراكچيمەن كەزدەسىپ، باتىس ازياداعى قاقتىعىستاردى رەتتەۋ ماسەلەسىن تالقىلادى.
كەزدەسۋ بارىسىندا پۋتين رەسەي يراننىڭ مۇددەسىنە سايكەس ارەكەت ەتۋگە دايىن ەكەنىن اتاپ ءوتتى. ول بۇل قادامنىڭ ايماقتاعى بارلىق حالىقتاردىڭ مۇددەسىنە قىزمەت ەتەتىنىن، بەيبىتشىلىككە قول جەتكىزۋدى جەدەلدەتۋگە باعىتتالعانىن ايتتى.
ء«وز تاراپىمىزدان، ءبىز سىزدەردىڭ مۇددەلەرىڭىزگە، ايماقتاعى بارلىق حالىقتىڭ مۇددەلەرىنە سايكەس بارلىق قاجەتتى ارەكەتتەردى جاسايمىز، وسىلايشا بەيبىتشىلىك مۇمكىندىگىنشە تەزىرەك ورنايدى»، – دەدى پۋتين.
پۋتين يراننىڭ جوعارعى جەتەكشىسى مودجتابا حامەنەي تاراپىنان كەلگەن حابارلامانى دا جەتكىزگەنىن ايتتى. ول يسلام رەسپۋبليكاسىنىڭ باسشىسىنا دەنساۋلىق پەن اماندىق تىلەدى.
«يران حالقىنىڭ ەرلىگى مەن تاۋەلسىزدىككە ۇمتىلىسىنا سۇيەنە وتىرىپ، جاڭا جەتەكشى باسشىلىعىمەن وسى قيىن سىناق كەزەڭىنەن ءوتىپ، بەيبىتشىلىك ورنايدى، دەپ ۇمىتتەنەمىز»، — دەپ قوستى ول.
ال اراكچي ماسكەۋگە تەگەرانعا كورسەتكەن قولداۋى ءۇشىن العىس ايتتى. ول ەكى ەل اراسىنداعى قاتىناستاردى جوعارى باعالاپ، ولار ءارى قاراي نىعاياتىنىن اتاپ ءوتتى. ديپلومات يران اقش-پەن كۇرەستى جالعاستىرا بەرەتىنىن جەتكىزدى.
«الەمگە دالەلدەنگەندەي، يران حالقى ءوز قارسىلىعى مەن ەرلىگى ارقىلى امەريكانىڭ شابۋىلدارى مەن اگرەسسياسىنا توتەپ بەرىپ، وسى كەزەڭدى امان-ەسەن وتكىزە الادى»، – دەپ ءتۇسىندىردى ول.
كەزدەسۋ باستالار الدىندا مينيستر رەسەيمەن باتىس ازياداعى قاقتىعىستى اياقتاۋ ءۇشىن كۇشتەردى ۇيلەستىرۋ ماسەلەسىن تالقىلاۋدى جوسپارلاپ وتىرعانىن مالىمدەگەن.
كەزدەسۋگە سىرتقى ىستەر ءمينيسترى سەرگەي لاۆروۆ، پرەزيدەنتتىڭ كومەكشىسى يۋري ۋشاكوۆ جانە اسكەري-ستراتەگيالىق جوسپارلاۋ باستىعى يگور كوستيۋكوۆ تا قاتىستى. يران دەلەگاتسياسىنا اراكچي مەن قاتار ونىڭ ورىنباسارى كازەم گاريب-ابادي جانە ماسكەۋدەگى ەلشى كازەم دجالالي كىردى.
