فوتو: Alessandro Bremec/IPA/picture alliance
ميلان بيلىگى جاستار قاتىسقان جاپپاي تارتىپسىزدىكتەردەن كەيىن قالاعا 500 اسكەري قىزمەتكەر جىبەرۋ تۋرالى شەشىمدى قولدادى. مينيسترلەر كابينەتى ماقۇلداعان جارلىققا سايكەس، اسكەري قىزمەتشىلەر قوعامدىق ءتارتىپتىڭ ساقتالۋىن قاداعالايدى. الايدا ولارعا ادامداردى تۇتقىنداۋ قۇقىعى بەرىلمەيدى، دەپ حابارلايدى "ادىرنا".
Corriere della Sera گازەتىنىڭ جازۋىنشا، يتاليانىڭ قورعانىس ءمينيسترى گۆيدو كروزەتتو اسكەري قىزمەتشىلەردىڭ وكىلەتتىگىن كەڭەيتۋدى ۇسىنعان. بىراق رەسپۋبليكا پرەزيدەنتىمەن كەڭەسكەننەن كەيىن بۇل شارا جارلىق ماتىنىنەن الىنىپ تاستالعان.
جاڭا جارلىقتا تارتىپسىزدىككە قاتىسقان كامەلەتكە تولماعانداردىڭ جاۋاپكەرشىلىگىن كۇشەيتۋ جانە قوعامدىق شەرۋلەر كەزىندە جاسالعان زورلىق-زومبىلىق ارەكەتتەرى ءۇشىن قىلمىستىق جاۋاپكەرشىلىككە تارتۋ كوزدەلگەن. جازا شارالارى، سونىڭ ىشىندە ۇستاۋ، 14 جاستان اسقان جاسوسپىرىمدەرگە دە قولدانىلۋى مۇمكىن.
بۇل شارالار ميلاندا باعانىڭ وسۋىنە قارسى وتكەن شەرۋلەر كەزىندە بولعان تارتىپسىزدىكتەردەن كەيىن قابىلداندى. مالىمەتكە سايكەس، اكتسياعا قاتىسۋشىلاردىڭ 80 پايىزى كامەلەتكە تولماعاندار بولعان.
بيلىك وكىلدەرى دۇكەندەردى توناۋ جانە مۇلىكتى ءبۇلدىرۋ ارەكەتتەرىمەن قاتار جۇرگەن مۇنداي تارتىپسىزدىكتەر الداعى دەمالىس كۇندەرى تاعى قايتالانۋى مۇمكىن دەپ قاۋىپتەنەدى.
La Repubblica گازەتىنىڭ حابارلاۋىنشا، قاۋىپسىزدىك شارالارىن كۇشەيتۋگە باعىتتالعان قازىرگى جارلىق – سوڭعى ءتورت جىلدا قابىلدانعان جەتىنشى قۇجات. بۇعان دەيىن الدىن الا ۇستاۋ شارالارىن قوسا العاندا، بىرقاتار جارلىق قابىلدانعانىمەن، ولار كۇتكەن ناتيجە بەرمەگەن. باسىلىم مۇنى اتالعان شارالاردىڭ تيىمسىزدىگىنىڭ بەلگىسى دەپ باعالايدى.
گازەتتىڭ جازۋىنشا، مۇنداي جارلىقتاردى قابىلداۋ ۇدەرىسى دجوردجا مەلوني ۇكىمەتى 2022 جىلى بيلىككە كەلگەننەن كەيىن باستالعان. العاشقى قۇجاتتاردىڭ ءبىرى رەيۆ-كەشتەرگە قارسى باعىتتالسا، كەيىنگى جارلىقتار الەۋمەتتىك جاعدايى كۇردەلى اۋداندارداعى جاسوسپىرىمدەر اراسىنداعى قىلمىسپەن كۇرەسۋگە جانە قازىرگى ۇكىمەتتىڭ ساياسي ۇستانىمدارىنا قارسى جاستار جينالاتىن الەۋمەتتىك ورتالىقتاردىڭ قىزمەتىنە قاتىستى ماسەلەلەرگە باعىتتالعان.
