فوتو: SCANPIX / REUTERS
رەسەيدىڭ بۇرىنعى ۆيتسە-پرەمەرى ءارى «روسنانو» كورپوراتسياسىنىڭ ەكس-باسشىسى اناتولي چۋبايس 2022 جىلعى ناۋرىزدا رەسەي پرەزيدەنتى ۆلاديمير پۋتينگە حات جولداپ، ۋكراينانىڭ اۋماعىنا جاسالعان تولىق اۋقىمدى باسقىنشىلىقتى سىناعان جانە سوعىستى توقتاتۋعا شاقىرعان. بۇل تۋرالى بۇۇ-نىڭ رەسەيدەگى ادام قۇقىقتارى جونىندەگى ارنايى بايانداماشىسى ماريانا كاتساروۆانىڭ جاڭا بايانداماسىندا ايتىلعان، دەپ حابارلايدى «ادىرنا» ۇلتتىق پورتالى DW باسىلىمىنا سىلتەپ.
15 قازاندا تانىستىرىلعان قۇجاتقا سايكەس، چۋبايس حات جولداعاننان كەيىن پرەزيدەنتتىڭ ارنايى وكىلى قىزمەتىنەن بوساپ، رەسەيدەن كەتكەن. ول «ەحو» باسىلىمىنا بەرگەن تۇسىنىكتەمەسىندە ۆلاديمير پۋتينگە وسىنداي حات جازعانىن راستاعان.
بايانداما اۆتورى ماريانا كاتساروۆا «روسنانو» كومپانياسىنىڭ بۇرىنعى توپ-مەنەدجەرلەرىنە قاتىستى قۋدالاۋدى چۋبايستىڭ سوعىسقا قارسى ۇستانىمىمەن بايلانىستىرادى. ونىڭ ايتۋىنشا، بۇل ىستەر ساياسي سەبەپتەرمەن اكتيۆتەردى تارتىپ الۋ جانە كاسىپكەرلەردى قۋدالاۋ ماسەلەلەرى اياسىندا قاراستىرىلعان. قۇجاتتا رەسەي بيلىگى «روسنانو» كومپانياسىمەن بايلانىستى كەمىندە 22 ادامعا ايىپ تاققانى كورسەتىلگەن.
اتاپ ايتقاندا، بيىل كومپانيانىڭ بۇرىنعى توپ-مەنەدجەرلەرى بوريس گالكين مەن اندرەي كۋشنارەۆ بيۋدجەت قاراجاتىن جىمقىرۋ ءىسى بويىنشا توعىز جىلعا باس بوستاندىعىنان ايىرىلعان. ال بۇرىنعى باسشىلار اندرەي مالىشەۆ پەن يرينا راپوپورت تيىسىنشە 12 جانە 15 جىلعا سوتتالعان.
«ەحو» باسىلىمىنىڭ مالىمەتىنشە، ايىپتالۋشىلار وزدەرىنە قاتىستى قىلمىستىق ىستەردى چۋبايستىڭ رەسەيگە ورالۋدان باس تارتۋىمەن بايلانىستىرعان.
اناتولي چۋبايس 2008–2020 جىلدارى «روسنانو» كورپوراتسياسىن باسقارعان. رەسەيدەن كەتكەننەن كەيىن ۆلاديمير پۋتين ونى بىرنەشە رەت سىنعا العان. 2023 جىلى رەسەي پرەزيدەنتى چۋبايستىڭ ەلدەن كەتۋىن كومپانياداعى «وراسان زور قارجىلىق ولقىلىقپەن» بايلانىستىرىپ، وعان قاتىستى سىن پىكىر بىلدىرگەن.
2025 جىلعى قاڭتاردا مەملەكەتتىك دۋما دەپۋتاتتارى اندرەي كارتاپولوۆ پەن اندرەي لۋگوۆوي تەرگەۋ كوميتەتى مەن باس پروكۋراتۋراعا چۋبايستىڭ قىزمەتىنە قاتىستى تەكسەرۋ جۇرگىزۋدى تالاپ ەتىپ، ساۋال جولداعان.
2025 جىلدىڭ سوڭىندا سوت چۋبايس پەن ونىڭ «روسنانو» كومپانياسىنداعى بۇرىنعى ارىپتەستەرىنىڭ مۇلكىنە تىيىم سالعان. بۇل شەشىم كومپانيانىڭ جاڭا باسشىلىعىنىڭ شىعىندى ءوندىرىپ الۋ تۋرالى تالاپ-ارىزى اياسىندا قابىلدانعان. تالاپ ماگنيتورەزيستيۆتى جەدەل جاد (MRAM) ءوندىرۋ جوبالارىنا قاتىستى بولعان.
2026 جىلعى مامىردا چۋبايس «روسنانونىڭ» بۇرىنعى ارىپتەستەرىن قورعاپ، كورپوراتسيانىڭ جاڭا باسشىلىعىن رەيدەرلىك ارەكەت جاسادى دەپ ايىپتاعان.
