Фото: Alessandro Bremec/IPA/picture alliance
Милан билігі жастар қатысқан жаппай тәртіпсіздіктерден кейін қалаға 500 әскери қызметкер жіберу туралы шешімді қолдады. Министрлер кабинеті мақұлдаған жарлыққа сәйкес, әскери қызметшілер қоғамдық тәртіптің сақталуын қадағалайды. Алайда оларға адамдарды тұтқындау құқығы берілмейді, деп хабарлайды "Адырна".
Corriere della Sera газетінің жазуынша, Италияның қорғаныс министрі Гвидо Крозетто әскери қызметшілердің өкілеттігін кеңейтуді ұсынған. Бірақ республика президентімен кеңескеннен кейін бұл шара жарлық мәтінінен алынып тасталған.
Жаңа жарлықта тәртіпсіздікке қатысқан кәмелетке толмағандардың жауапкершілігін күшейту және қоғамдық шерулер кезінде жасалған зорлық-зомбылық әрекеттері үшін қылмыстық жауапкершілікке тарту көзделген. Жаза шаралары, соның ішінде ұстау, 14 жастан асқан жасөспірімдерге де қолданылуы мүмкін.
Бұл шаралар Миланда бағаның өсуіне қарсы өткен шерулер кезінде болған тәртіпсіздіктерден кейін қабылданды. Мәліметке сәйкес, акцияға қатысушылардың 80 пайызы кәмелетке толмағандар болған.
Билік өкілдері дүкендерді тонау және мүлікті бүлдіру әрекеттерімен қатар жүрген мұндай тәртіпсіздіктер алдағы демалыс күндері тағы қайталануы мүмкін деп қауіптенеді.
La Repubblica газетінің хабарлауынша, қауіпсіздік шараларын күшейтуге бағытталған қазіргі жарлық – соңғы төрт жылда қабылданған жетінші құжат. Бұған дейін алдын ала ұстау шараларын қоса алғанда, бірқатар жарлық қабылданғанымен, олар күткен нәтиже бермеген. Басылым мұны аталған шаралардың тиімсіздігінің белгісі деп бағалайды.
Газеттің жазуынша, мұндай жарлықтарды қабылдау үдерісі Джорджа Мелони үкіметі 2022 жылы билікке келгеннен кейін басталған. Алғашқы құжаттардың бірі рейв-кештерге қарсы бағытталса, кейінгі жарлықтар әлеуметтік жағдайы күрделі аудандардағы жасөспірімдер арасындағы қылмыспен күресуге және қазіргі үкіметтің саяси ұстанымдарына қарсы жастар жиналатын әлеуметтік орталықтардың қызметіне қатысты мәселелерге бағытталған.
