اقمولا وبلىسى ءبىلىم باسقارماسىنىڭ «ءبىلىم-يننوۆاتسيا» ليتسەي-ينتەرناتىنىڭ 11-سىنىپ وقۋشىسى حايرۋشەۆ جاراس شەتەلدىك 6 ۋنيۆەرسيتەتتىڭ گرانتىن ۇتىپ الدى، دەپ حابارلايدى «ادىرنا» ءتىلشىسى.
«جاراس اقش-تىڭ 6 ۋنيۆەرسيتەتىنىڭ ( Widener university - 148000$; Michigan state university - 72000$; Arizona state university - 52000$,Loyola university Chicago - 84000$, Adelphi university - 100000$, George Mason university - 48000$ ) گرانت يەگەرى اتاندى. سونداي-اق اقش-تىڭ جانە كانادانىڭ 4 ۋنيۆەرسيتەتىنەن (Pennsylvania state university, University of Illinois Chicago, University of Toronto ، University of Ottawa) ارنايى شاقىرتۋ الىپ وتىر»،—دەدى وبلىستىق ءبىلىم باسقارماسى.
جاس تۇلەك بالا كەزىنەن كريميناليست بولۋدى ارماندايدى. بۇل سالا تۋرالى ءتۇرلى فيلم مەن كوركەم ادەبيەتتى وقىپ، بولاشاق ماماندىعى تۋرالى ىزدەنۋدى 7-سىنىپتان باستاعان.
«قازىرگى قوعامدا قىلمىستىڭ ءورشىپ تۇرعاندىعى جانە ونىڭ الدىن الۋ جولدارى قانداي دەگەن ساۋال جاراستى بەي-جاي قالدىرمادى. ول وسى ماسەلە توڭىرەگىندە ۇنەمى ىزدەنىپ، ءتۇرلى ادەبيەتتەر وقىپ، 2022-2023 وقۋ جىلى “How do people get on the path murder and violence” دەگەن تاقىرىپتا ادامداردىڭ قىلمىسقا بارۋ سەبەبى جونىندە عىلىمي زەرتتەۋ جوبا جۇمىسىن جازادى. 2021-2022, 2022-2023 وقۋ جىلى جاراس اعىلشىن تىلىندەگى رەسپۋبليكالىق دەبات تۋرنيرلەرىنە قاتىسىپ، 1-ورىن يەگەرى اتاندى. سونداي-اق اعىلىشىن تىلىندەگى “World scholars cup” حالىقارالىق وليمپياداسىنا قاتىسىپ، 5 التىن، 1 كۋمىس مەدال يەلەندى. ۇزدىكسىز دايىندىق پەن تاباندىلىعىنىڭ ناتيجەسىندە جاراس IELTS سىناعىن 7 بالعا، SAT ەمتيحانىن 1200 بالعا تاپسىرىپ، ءوزى ارمان ەتكەن كريميناليست ماماندىعى بويىنشا شەتەلدىڭ بەلدى وقۋ ورىندارىندا زاماناۋي ءبىلىم الۋ مۇمكىندىگىنە يە بولدى.بۇل، ارينە، وقۋشى مەن اتا-اناسى ءۇشىن ۇلكەن قۋانىش جانە وقۋشىلارىن ءبىلىم شىڭدارىن باعىندىرۋعا تالاپتاندىرىپ وتىرعان «ءبىلىم-يننوۆاتسيا»ليتسەي-ينتەرناتىنىڭ تابىستى جەڭىسى دەپ بىلەمىز»،—دەپ تۇيىندەدى باسقارما.
