يراننىڭ حورموزگان ءۋالاياتىنا قاراستى ميناب وكرۋگىندە ورنالاسقان قىزدارعا ارنالعان باستاۋىش مەكتەپكە جاسالعان اۋە سوققىسى سالدارىنان الپىسقا جۋىق بالا قازا تاپتى، دەپ حابارلايدى "ادىرنا" ۇلتتىق پورتالى.
الدىن الا مالىمەت بويىنشا، قازا تاپقاندار بولەك تاعى 80 ادام جاراقات العان. قۇتقارۋ جۇمىستارى ءالى دە جالعاسىپ جاتقاندىقتان، قۇرباندار سانى وزگەرۋى مۇمكىن.
يران بيلىگى بۇل شابۋىل ءۇشىن يزرايل قورعانىس ارمياسىن جاۋاپتى دەپ ايىپتادى. بۇل تۋرالى ەلدىڭ دەنساۋلىق ساقتاۋ مينيسترلىگى ۆەدومستۆونىڭ ءباسپاسوز قىزمەتى جەتەكشىسى حوسەين كەرمانپۋرعا سىلتەمە جاساپ مالىمدەدى.
28 اقپاندا جاعداي كۇرت شيەلەنىسە ءتۇستى. يزرايل قورعانىس ارمياسى يران اۋماعىنداعى ونداعان اسكەري نىسانعا الدىن الا سوققى جاساعانىن حابارلادى. ءوز كەزەگىندە تەگەران جاۋاپ رەتىندە تەل-اۆيۆ قالاسىنا بالليستيكالىق زىمىراندارمەن شابۋىل جاساپ، سونداي-اق اقش-تىڭ اسكەري بازالارىن نىساناعا العان.
اقش پرەزيدەنتى دونالد ترامپ ارنايى مالىمدەمەسىندە ۆاشينگتوننىڭ يراننىڭ يادرولىق باعدارلاماسىنا قاتىستى «شىدامى تاۋسىلعانىن» ايتتى. ونىڭ سوزىنشە، تەگەران كەلىسىمدەردەن باس تارتىپ، الىس قاشىقتىققا ۇشاتىن زىمىرانداردى دامىتۋىن جالعاستىرىپ وتىر.
يران سىرتقى ىستەر مينيسترلىگى بىرىككەن ۇلتتار ۇيىمى مەن حالىقارالىق قاۋىمداستىقتى بۇل جاعدايدى ايىپتاۋعا جانە شۇعىل شارالار قابىلداۋعا شاقىردى. رەسمي تەگەران اقش پەن يزرايل ارەكەتتەرى وڭىرلىك جانە جاھاندىق قاۋىپسىزدىككە بۇرىن-سوڭدى بولماعان قاۋىپ ءتوندىرىپ وتىرعانىن مالىمدەدى.
ال رەسەي سىرتقى ىستەر مينيسترلىگى تاراپتاردى ساياسي-ديپلوماتيالىق جولمەن كەلىسىمگە كەلۋگە شاقىرىپ، قاقتىعىستى بەيبىت رەتتەۋدىڭ ماڭىزىن اتاپ ءوتتى.
وقيعاعا بايلانىستى يران اۋە كەڭىستىگى ۋاقىتشا جابىلىپ، ازاماتتارعا اۋەجايلارعا بارماۋ ۇسىنىلدى.
