İrannyŋ Hormozgan uälaiatyna qarasty Minab okrugınde ornalasqan qyzdarǧa arnalǧan bastauyş mektepke jasalǧan äue soqqysy saldarynan alpysqa juyq bala qaza tapty, dep habarlaidy "Adyrna" ūlttyq portaly.
Aldyn ala mälımet boiynşa, qaza tapqandar bölek taǧy 80 adam jaraqat alǧan. Qūtqaru jūmystary älı de jalǧasyp jatqandyqtan, qūrbandar sany özgeruı mümkın.
İran bilıgı būl şabuyl üşın İzrail qorǧanys armiiasyn jauapty dep aiyptady. Būl turaly eldıŋ densaulyq saqtau ministrlıgı vedomstvonyŋ baspasöz qyzmetı jetekşısı Hosein Kermanpurǧa sılteme jasap mälımdedı.
28 aqpanda jaǧdai kürt şielenıse tüstı. İzrail qorǧanys armiiasy İran aumaǧyndaǧy ondaǧan äskeri nysanǧa aldyn ala soqqy jasaǧanyn habarlady. Öz kezegınde Tegeran jauap retınde Tel-Aviv qalasyna ballistikalyq zymyrandarmen şabuyl jasap, sondai-aq AQŞ-tyŋ äskeri bazalaryn nysanaǧa alǧan.
AQŞ prezidentı Donald Tramp arnaiy mälımdemesınde Vaşingtonnyŋ İrannyŋ iadrolyq baǧdarlamasyna qatysty «şydamy tausylǧanyn» aitty. Onyŋ sözınşe, Tegeran kelısımderden bas tartyp, alys qaşyqtyqqa ūşatyn zymyrandardy damytuyn jalǧastyryp otyr.
İran syrtqy ıster ministrlıgı Bırıkken Ūlttar Ūiymy men halyqaralyq qauymdastyqty būl jaǧdaidy aiyptauǧa jäne şūǧyl şaralar qabyldauǧa şaqyrdy. Resmi Tegeran AQŞ pen İzrail äreketterı öŋırlık jäne jahandyq qauıpsızdıkke būryn-soŋdy bolmaǧan qauıp töndırıp otyrǧanyn mälımdedı.
Al Resei syrtqy ıster ministrlıgı taraptardy saiasi-diplomatiialyq jolmen kelısımge keluge şaqyryp, qaqtyǧysty beibıt retteudıŋ maŋyzyn atap öttı.
Oqiǧaǧa bailanysty İran äue keŋıstıgı uaqytşa jabylyp, azamattarǧa äuejailarǧa barmau ūsynyldy.
