يران اقش تاراپىنان جاڭا اسكەري سوققى جاسالعان جاعدايدا، جاۋاپ شابۋىلدارىنىڭ اۋقىمىن كەڭەيتىپ، قاقتىعىس گەوگرافياسىن تاياۋ شىعىستان تىس ايماقتارعا دەيىن جەتكىزۋى مۇمكىن، دەپ حابارلايدى "ادىرنا" ۇلتتىق پورتالى.
بۇل تۋرالى يران ارمياسىنىڭ وكىلى، بريگادا گەنەرالى مۇحاممەد اكرامينيا ايتتى.
يراننىڭ Mehr اگەنتتىگىنىڭ 3 قاراشاداعى مالىمەتىنشە، اكرامينيا ەل قارۋلى كۇشتەرى ىقتيمال شابۋىل نىساندارىنىڭ ءتىزىمىن جاڭارتىپ جاتقانىن ايتقان. ونىڭ سوزىنشە، اسكەري تەكەتىرەس قايتا باستالسا، يران قارۋى جەتەتىن اۋماقتاعى اقش-تىڭ اسكەري نىساندارى، تەحنيكاسى، اسكەري قىزمەتشىلەرى مەن وزگە دە مۇددەلەرىنە سوققى جاسالۋى مۇمكىن.
اكرامينيانىڭ ايتۋىنشا، يراننىڭ قارسىلاستارى ەلدىڭ باتىس شەكاراسىندا قۇرلىق مايدانىن اشۋ ماقساتىندا يراكتىڭ سولتۇستىگىندەگى كۇردىستان ايماعىندا ورنالاسقان ۇكىمەتكە قارسى قارۋلى توپتاردى پايدالانۋعا تىرىسقان. الايدا يران اسكەرى بۇل توپتاردىڭ بەكىنىستەرىنە الدىن الا سوققى بەرىپ، ولاردىڭ جوسپارىنا توسقاۋىل قويعانىن مالىمدەدى.
بۇل مالىمدەمەلەر اقش-تىڭ ورمۇز بۇعازى ماڭىنداعى يران نىساندارىنا، سونىڭ ىشىندە كەشم ارالىنا شەكتەۋلى اسكەري سوققى جاساعانى تۋرالى اقپارات تاراعان تۇستا ايتىلدى. ۆاشينگتون بۇل وپەراتسيانى اقش نىساندارىنا تونگەن قاۋىپكە جاۋاپ رەتىندە جاسالعان قورعانىس شاراسى دەپ ءتۇسىندىردى.
سونىمەن بىرگە ەكى ەل اراسىنداعى ديپلوماتيالىق بايلانىستار جالعاسىپ جاتىر. اقش ۆيتسە-پرەزيدەنتى دجەي دي ۆەنس يرانمەن جاناما كەلىسسوزدەردە ىلگەرىلەۋشىلىك بارىن ايتقان. ال تەگەران كەلىسىمگە كەلۋ ءۇشىن اقش-تىڭ تەڭىز بلوكاداسىن توقتاتۋ جانە وزگە دە تالاپتارىن ورىنداۋ قاجەت ەكەنىن مالىمدەدى. يران بۇعازدى ەكى كۇن ىشىندە قايتا اشۋ جوسپارىن دا ۇسىنعان.
ايتا كەتەيىك، يراننىڭ جوعارعى كوشباسشىسى مودجتابا حامەنەي قارۋلى كۇشتەرگە ەلگە تونگەن كەز كەلگەن قاۋىپكە ونىڭ گەوگرافيالىق ورنالاسۋىنا قاراماستان، جەدەل ءارى قاتاڭ جاۋاپ بەرۋدى تاپسىرعان.
