Фото: Getty Images
Оңтүстік Африка Республикасынан шыққан заңгер Наванетхем «Нави» Пиллэй 2026 жылғы Нобель бейбітшілік сыйлығына ие болды. Ол халықаралық құқықты дамытуға, әскери қылмыстар мен геноцидке қарсы күреске қосқан үлесі үшін марапатталды. Бұл туралы ВВС жазды, деп хабарлайды “Адырна”.
Норвегияның Нобель комитеті Пиллэйдің халықаралық құқықтың беделін арттырудағы еңбегін ерекше атап өтті. Комитет өкілдерінің пікірінше, соғыстар мен қарулы қақтығыстар көбейген қазіргі кезеңде халықаралық құқық бейбітшілік пен қауіпсіздікті қамтамасыз етудің негізгі тетіктерінің біріне айналды.
1941 жылы 23 қыркүйекте Оңтүстік Африка Республикасында дүниеге келген Нави Пиллэй 1967 жылы Натал провинциясында жеке заңгерлік тәжірибесін ашқан алғашқы ақ нәсілді емес әйел болды. Ол апартеидке қарсы күресушілерді қорғап, билік тарапынан жасалған азаптау мен адам құқықтарының бұзылу деректерін жария етуге атсалысты.
Пиллэй еңбек жолында Оңтүстік Африканың Жоғарғы сотында, Руанда жөніндегі халықаралық қылмыстық трибуналда және Халықаралық қылмыстық сотта судья қызметін атқарды. Сонымен қатар БҰҰ-ның Адам құқықтары жөніндегі жоғарғы комиссары болды. Ол халықаралық құқық пен адам құқықтарын қорғау саласындағы тәжірибесімен танылған.
Биылғы Нобель бейбітшілік сыйлығына 287 адам мен ұйым ұсынылған. Үміткерлердің есімдері 50 жыл бойы құпия сақталатындықтан, олардың толық тізімі жарияланбайды.
Соңғы жылдары бұл марапатқа адам құқықтарын қорғаушылар, бейбітшілік қозғалыстары мен халықаралық ұйымдар ие болып келеді. 2025 жылы Нобель бейбітшілік сыйлығы Венесуэла оппозициясының жетекшісі Мария Корина Мачадоға берілген.
Нобель бейбітшілік сыйлығының лауреаты дипломмен, алтын медальмен және 1,2 миллион доллар көлеміндегі ақшалай сыйақымен марапатталады.
