20 маусымда ҚР Сыртқы істер министрлігі Иран мен Израильден қазақстандықтарды эвакуациялауды жалғастырып жатқаны туралы мәлімдеді, деп хабарлайды "Адырна" ұлттық порталы.
Ақпаратқа сәйкес, эвакуациялық іс-шаралар аясында Израильден – 66 отандасымыз (Египет арқылы), Ираннан – 78 азамат (Армения арқылы – 73, Әзербайжан арқылы – 2, Түрікменстан арқылы – 3) елге жеткізілген.
«Иран мен Израильдегі қазақстандық дипломаттар өз азаматтарына қажетті консулдық және құқықтық көмек көрсету жұмысын жалғастыруда. ҚР СІМ Израиль, Египет және Армения билігіне алғыс білдіреді. Сондай-ақ, ирандық, әзербайжандық және түрікмен әріптестерге де Қазақстан азаматтарын эвакуациялауға қолдау көрсеткені үшін ризашылығын білдіреді. Бірлескен күш-жігердің арқасында көбірек азаматтар үйлеріне аман-есен оралуға мүмкіндік алып жатыр», – делінген министрліктің баспасөз қызметі таратқан хабарламада.
Бұған дейін, 2025 жылғы 18 маусымда, ҚР Сыртқы істер министрлігі Ираннан 109 қазақстандықтың эвакуацияланғанын хабарлаған еді. Олар елге Түрікменстан мен Әзербайжан арқылы жеткізілген болатын.
