Ақтөбеде сот екі жергілікті тұрғынды және Шымкент қаласының бір тұрғынын радиоактивті уранды сатқаны үшін бас бостандығынан айыру жазасына кесті. Бұл туралы «Диапазон» басылымы жазды, деп хабарлайды “Адырна”.
Қылмыстық іс материалдарына сәйкес, Өзбекстан азаматы заңсыз жолмен салмағы 958,7 грамм болатын азайтылған уранды сатып алған. Кейін ол Шымкентте тұратын танысы Рудольфқа радиоактивті затты сату мүмкіндігі бар екенін айтқан. Ал Рудольф бұл туралы өз кезегінде Ақтөбе қаласының тұрғындары Қонысбай мен Еркінге жеткізген. Олар өз орталарында уранды сатып алатын адамдарды іздей бастаған.
Қыркүйек айында Өзбекстан азаматы азайтылған уранды Рудольфқа берген, ал ол тауарды Еркін мен Қонысбайға тапсырған. Олар уранды Chevrolet Tracker автокөлігінің жүк салғышында Шымкенттен Ақтөбеге алып келген.
Бұл жағдай туралы ҰҚК-ге мәлім болып, арнайы қызмет істі бақылауға алып, жалған сатып алушыны іске қосқан. Оған 500 мың доллардан сәл асатын сомадағы ақша берілген. Осы «сатып алушы» уран сатушыларымен қала сыртындағы орман алқабында кездескен.
ҰҚК жүргізген арнайы операция нәтижесінде Шымкент тұрғыны мен екі ақтөбелік ұсталды. Тәркіленген зат сараптамаға жіберіліп, оның радиоактивті заттан жасалғаны және уран екені анықталды. Сотта үш адам да өз кінәларын мойындады.
Сот үкімімен уран сатқаны үшін екі ақтөбелік екі жылға бас бостандығынан айырылды. Ал Шымкенттен келген сыбайласы бұрын сотталғандықтан, алты айға ұзақ мерзімге сотталды. Сот шешіміне сәйкес, уран жойылатын болды.
