Ақмола облысының Щучинск қаласында орналасқан дәмханада жарылыс болды, деп хабарлайды "Адырна" ұлттық порталы.
Қайғылы оқиға Бурабай ауданына қарасты қаладағы «Палау орталығы» мейрамханасында болған. Алдын ала мәліметтерге сәйкес, газ-ауа қоспасы жарылып, артынша ірі өртке ұласқан.
Төтенше жағдайлар департаментінің хабарлауынша, оқиға туралы ақпарат түскеннен кейін құтқарушылар 5 минут ішінде жеткен. Сол сәтте дәмхана ішінде шамамен 80 адам болған.
Жарылыс салдарынан 20 адам зардап шегіп, әуелде 6 адам қаза тапқаны хабарланған, соңынан бұл санның жетіге жеткені жарияланды.
Өрт сөндірушілер 10-нан астам адамды қауіпсіз жерге эвакуациялап, жарылу қаупі бар 8 газ баллонын ғимараттан алып шыққан.
Қазіргі уақытта өрт толық сөндірілді. Оқиға орнында үйінділерді тазалау жұмыстары жүргізіліп жатыр.
