Өзбекстан мен Украина билігі соғыс қимылдары аймағында тұтқынға түскен азаматтар ісі бойынша жеке форматта өзара ынтымақтастық орнатады. Бұл туралы Gazeta.uz басылымы жазды, деп хабарлайды «Адырна» тілшісі.
2 сәуірде Украина сыртқы істер министрінің орынбасары Александр Мищенконың Ташкентке жасаған сапары аяқталған болатын. Кездесу қорытындысы бойынша дипломат украин тарапының әрбір жағдайды өзбек ведомстволарымен өзара әрекеттесе отырып, жеке-жеке қарастыруға дайын екенін мәлімдеді. Сондай-ақ ол тұтқынға алынған Өзбекстан азаматтары әскери тұтқындар ретінде қарастырылатынын және оларға халықаралық нормаларға сәйкес гумандық қарым-қатынасқа кепілдік берілетінін еске салды.
«Қару алып Украинаға қарсы соғысқан және тұтқынға түскен бұл адамдарды біз әскери тұтқындар деп санаймыз. Бірақ біздің гумандық қарым-қатынасымыз бар. Қалған мәселелер арнайы қызметтер мен осы істермен айналысатын органдар арқылы жеке арналармен қаралады. Біз өзбекстандық әріптестерімізбен байланыс орнатуға дайынбыз, бұл мәселе бойынша толық түсіністік бар», — деді ол.
Министр соғысқа тарту схемасы алдау, бопсалау және табыс уәделері арқылы жүзеге асатынын атап өтті. Дипломат Өзбекстан тарапын халықты қауіп-қатер туралы белсендірек хабардар етуге және «жастардың осындай қиын жағдайларға душар болуына жол бермеу үшін науқандар жүргізуге» шақырып, алдын алу шараларының қажеттігін жеткізді.
«Біз достас елдердің азаматтары қақтығысқа қатысушылар қатарында болғанын мүлде қаламаймыз», — деді дипломат.
Журналистермен кездесуде Мищенко Украина Орталық Азиямен С5+1 форматында ынтымақтастыққа мүдделі екенін де атап өтті.
Еске салайық, 2025 жылдың қарашасында Өзбекстан 2022 жылдан бері елде азаматтардың шетелдегі қарулы қақтығыстарға қатысу фактілері бойынша 338 қылмыстық іс қозғалғанын хабарлаған еді.
