وزبەكستان مەن ۋكراينا بيلىگى سوعىس قيمىلدارى ايماعىندا تۇتقىنعا تۇسكەن ازاماتتار ءىسى بويىنشا جەكە فورماتتا ءوزارا ىنتىماقتاستىق ورناتادى. بۇل تۋرالى Gazeta.uz باسىلىمى جازدى، دەپ حابارلايدى «ادىرنا» ءتىلشىسى.
2 ساۋىردە ۋكراينا سىرتقى ىستەر ءمينيسترىنىڭ ورىنباسارى الەكساندر ميششەنكونىڭ تاشكەنتكە جاساعان ساپارى اياقتالعان بولاتىن. كەزدەسۋ قورىتىندىسى بويىنشا ديپلومات ۋكراين تاراپىنىڭ ءاربىر جاعدايدى وزبەك ۆەدومستۆولارىمەن ءوزارا ارەكەتتەسە وتىرىپ، جەكە-جەكە قاراستىرۋعا دايىن ەكەنىن مالىمدەدى. سونداي-اق ول تۇتقىنعا الىنعان وزبەكستان ازاماتتارى اسكەري تۇتقىندار رەتىندە قاراستىرىلاتىنىن جانە ولارعا حالىقارالىق نورمالارعا سايكەس گۋماندىق قارىم-قاتىناسقا كەپىلدىك بەرىلەتىنىن ەسكە سالدى.
«قارۋ الىپ ۋكرايناعا قارسى سوعىسقان جانە تۇتقىنعا تۇسكەن بۇل ادامداردى ءبىز اسكەري تۇتقىندار دەپ سانايمىز. بىراق ءبىزدىڭ گۋماندىق قارىم-قاتىناسىمىز بار. قالعان ماسەلەلەر ارنايى قىزمەتتەر مەن وسى ىستەرمەن اينالىساتىن ورگاندار ارقىلى جەكە ارنالارمەن قارالادى. ءبىز وزبەكستاندىق ارىپتەستەرىمىزبەن بايلانىس ورناتۋعا دايىنبىز، بۇل ماسەلە بويىنشا تولىق تۇسىنىستىك بار»، — دەدى ول.
مينيستر سوعىسقا تارتۋ سحەماسى الداۋ، بوپسالاۋ جانە تابىس ۋادەلەرى ارقىلى جۇزەگە اساتىنىن اتاپ ءوتتى. ديپلومات وزبەكستان تاراپىن حالىقتى قاۋىپ-قاتەر تۋرالى بەلسەندىرەك حاباردار ەتۋگە جانە «جاستاردىڭ وسىنداي قيىن جاعدايلارعا دۋشار بولۋىنا جول بەرمەۋ ءۇشىن ناۋقاندار جۇرگىزۋگە» شاقىرىپ، الدىن الۋ شارالارىنىڭ قاجەتتىگىن جەتكىزدى.
ء«بىز دوستاس ەلدەردىڭ ازاماتتارى قاقتىعىسقا قاتىسۋشىلار قاتارىندا بولعانىن مۇلدە قالامايمىز»، — دەدى ديپلومات.
جۋرناليستەرمەن كەزدەسۋدە ميششەنكو ۋكراينا ورتالىق ازيامەن س5+1 فورماتىندا ىنتىماقتاستىققا مۇددەلى ەكەنىن دە اتاپ ءوتتى.
ەسكە سالايىق، 2025 جىلدىڭ قاراشاسىندا وزبەكستان 2022 جىلدان بەرى ەلدە ازاماتتاردىڭ شەتەلدەگى قارۋلى قاقتىعىستارعا قاتىسۋ فاكتىلەرى بويىنشا 338 قىلمىستىق ءىس قوزعالعانىن حابارلاعان ەدى.
