Талдықорғанда кезекте тұрған 51 отбасы жаңа баспананың кілтіне ие болды. Жаңа қоныс иелерін Жетісу облысының әкімі Бейбіт Исабаев құттықтады, - деп хабарлайды Жетісу облысы әкімінің баспасөз қызметі.
Өңір басшысы атап өткендей, азаматтарды қолжетімді тұрғын үймен қамтамасыз ету – халықтың өмір сүру сапасы мен әлеуметтік әл-ауқатын арттыруға бағытталған мемлекеттік саясаттың басым бағыттарының бірі.
– Мемлекет басшысының тапсырмасы аясында өңірде тұрғын үй құрылысының қарқыны жылдан жылға артып келеді. Мәселен, жыл басынан бері Талдықорған қаласының өзінде 49 мың шаршы метр тұрғын үй пайдалануға берілді. Яғни өткен жылдың сәйкес кезеңімен салыстырғанда 3,4 пайызға артқан. Жыл соңына дейін кезең-кезеңімен Талдықорғанның 1400-ден астам отбасын қолжетімді баспанамен қамтамасыз етуді жоспарлап отырмыз, – деді Б. Исабаев.
Жаңа баспана кезекте тұрған азаматтарға мемлекеттік қолдау шаралары аясында берілді. Олардың арасында көпбалалы және толық емес отбасылар, жетім балалар мен ата-анасының қамқорлығынсыз қалған балалар, І және ІІ топтағы мүгедектігі бар азаматтар бар.
Жаңа қоныс иелері өз әсерін бөлісті:
– Бүгін отбасымыз үшін үлкен қуаныш. Жаңа қонысқа ие болып жатырмыз. «Жастар-3» шағын ауданындағы жаңа үйіміздің кілтін қолымызға алдық. Тұрғын үй кезегінде 9 жылға жуық тұрдым. Алты бала тәрбиелеп отырмын, оның бесеуі мектеп оқушылары, – деді Динара Отарбаева.
– 2017 жылдан бері тұрғын үй кезегінде тұрдым. Қуанышымды сөзбен айтып жеткіе алмаймын. Ең алдымен балаларымды ертіп апарып, өздерінің жеке үйлерін көрсетемін. Енді олардың өз бөлмелері болады, кең әрі жайлы жерде тұратын болдық. Осы уақытқа дейін талай жыл пәтер жалдап тұрдық. Енді, міне, өз баспанамыз бар. Көрсетілген қолдау үшін шын жүректен алғыс айтамын, – деді Дана Жаманаева.
– Тұрғын үй кезегінде 10 жыл тұрдық. Осы уақыт ішінде бір жалдамалы пәтерден екіншісіне көшіп, талай қиындықты бастан өткердік. Балалармен бірге көшіп-қону әрине қиын болды. Енді мұның бәрі артта қалды. Жас отбасымыздың жаңа шағын ауданда өз баспанасы бар деп қуанып жатырмыз, – деді «Құлагер» шағын ауданынан пәтер алған Торғын Тойшыбекова.
Атап өтсек, алдағы уақытта Талдықорған қаласында «Бірлік» шағын ауданында 170 пәтерге арналған екі кредиттік үйді пайдалануға беру жоспарланып отыр. Сондай-ақ жыл соңына дейін «Ынтымақ» тұрғын алабында 200 пәтерге арналған бес бесқабатты үйдің құрылысы аяқталып, пайдалануға беріледі.
Жалпы, соңғы 4 жылда Жетісу облысында 1,4 млн шаршы метр тұрғын үй пайдалануға беріліп, 11 мыңға жуық астам отбасы жаңа қонысқа ие болды.
