2026 жылғы 18 ақпанда Астана қаласында AI91: «Жасанды интеллект бар әлемдегі менеджмент және оқыту» атты мектеп директорларының Бірінші республикалық форумы өтеді. Іс-шара білім беру саласының басшылары мен сарапшыларына арналған кәсіби алаң болмақ.
Форум барысында мемлекеттік органдар өкілдері, EdTech саласының мамандары және педагогикалық қауымдастық жасанды интеллект дәуіріндегі мектеп басқару стратегияларын практикалық тәжірибе мен нақты кейстер негізінде талқылайды. Шараға 250-ден астам қатысушы және 10-нан аса халықаралық және қазақстандық спикер қатысады деп жоспарланып отыр.
Форумды Amansultan білім беру платформасы №91 мектеп-гимназиясымен бірлесіп, Астана қаласының Білім басқармасының қолдауымен ұйымдастырады.
Бағдарлама аясында мемлекеттік органдардың өкілдері, білім беру және цифрлық технологиялар саласындағы халықаралық және қазақстандық сарапшылар баяндама жасайды. Негізгі спикерлер қатарында ҚР Жасанды интеллект және цифрлық даму бірінші вице-министрі Ростислав Коняшкин, ҚР Оқу-ағарту вице-министрі Асылбек Ахметжанов, «TALAP» қолданбалы зерттеулер орталығының бас экономисі Рахым Ошақбаев, Amansultan білім беру платформасының негізін қалаушы Нұрлан Қиясов, Microsoft Kazakhstan компаниясының Орталық Азия және Пәкістан аймағындағы білім беру бағыты бойынша даму директоры Данияр Жұмабеков бар.
AI91 форумы ҚР Оқу-ағарту министрлігі мен Жасанды интеллект және цифрлық даму министрлігінің өкілдеріне, мектеп директорлары мен олардың орынбасарларына, әдістемелік орталық сарапшыларына, сондай-ақ бизнес және EdTech-компаниялар өкілдеріне арналған.
