Астанада «PARYZ» ҚР Ұлттық жұмыс берушілер конфедерациясының ұйымдастыруымен NEF 2026 Қазақстан жұмыс берушілер қауымдастықтарының бірінші ұлттық форумы өтіп жатыр. Іс-шара бизнес, қауымдастықтар, мемлекеттік органдар өкілдері мен халықаралық сарапшылардың басын қосуда.
«PARYZ» ҚР Ұлттық жұмыс берушілер конфедерациясы Президиумының төрағасы Жұмабек Жанықұлов өз сөзінде жаңа институционалдық бастамалардың — Жұмыс берушілер қауымдастықтарын қолдау орталығы мен Әйел жұмыс берушілер платформасының іске қосылатынын жариялады.
Президиум басшысының айтуынша, Қазақстанда алғаш рет өткізіліп отырған форум тек талқылау алаңы ғана емес, сонымен бірге жұмыс берушілер институтын күшейту мен бизнес-қоғамдастықты шоғырландырудың практикалық тетіктерін іске қосу нүктесіне айналуы тиіс.
«Біздің міндетіміз — мәселелерді жай ғана талқылау емес, өзара іс-қимылдың тұрақты жүйесін құру, құзыреттерді арттыру, жұмыс берушілердің басын біріктіру және диалогты нақты нәтижеге айналдыру», — деп атап өтті Президиум төрағасы.
Жұмыс берушілер қауымдастықтарын қолдау орталығы жұмыс берушілердің салалық және өңірлік бірлестіктерінің әлеуетін күшейтуге, сараптамалық және ұйымдастырушылық қолдауды дамытуға, үздік тәжірибелермен алмасуға және бизнес мүдделерін тиімді білдіруді нығайтуға бағытталады.
Сонымен қатар, Әйел жұмыс берушілер платформасын іске қосу жоспарлануда. Ол көшбасшылықты дамыту, тәжірибе алмасу, әйелдер кәсіпкерлігін ілгерілету және әйелдердің экономика мен бизнес-қоғамдастықтағы рөлін нығайту кеңістігіне айналады. Бастама әйел жұмыс берушілерді біріктіруге және олардың әлеуметтік-еңбек және экономикалық күн тәртібінде шешімдер қабылдауға қатысуын кеңейтуге арналған.
Ж. Жанықұлов атап өткендей, күшті жұмыс берушілер бірлестіктері, әділ әлеуметтік диалог және бизнесті шоғырландыру тұрақты экономика мен бәсекеге қабілетті еңбек нарығын қалыптастырудың негізгі шарттары болып табылады.
Форумға елдің түкпір-түкпірінен 600-ге жуық қатысушы жиналды, олардың қатарында мемлекеттік органдардың, халықаралық ұйымдардың, бизнестің, жұмыс берушілердің салалық және өңірлік қауымдастықтарының мүшелері мен өкілдері және т.б. бар.
