Astanada «PARYZ» QR Ūlttyq jūmys beruşıler konfederasiiasynyŋ ūiymdastyruymen NEF 2026 Qazaqstan jūmys beruşıler qauymdastyqtarynyŋ bırınşı ūlttyq forumy ötıp jatyr. Is-şara biznes, qauymdastyqtar, memlekettık organdar ökılderı men halyqaralyq sarapşylardyŋ basyn qosuda.
«PARYZ» QR Ūlttyq jūmys beruşıler konfederasiiasy Prezidiumynyŋ töraǧasy Jūmabek Janyqūlov öz sözınde jaŋa institusionaldyq bastamalardyŋ — Jūmys beruşıler qauymdastyqtaryn qoldau ortalyǧy men Äiel jūmys beruşıler platformasynyŋ ıske qosylatynyn jariialady.
Prezidium basşysynyŋ aituynşa, Qazaqstanda alǧaş ret ötkızılıp otyrǧan forum tek talqylau alaŋy ǧana emes, sonymen bırge jūmys beruşıler institutyn küşeitu men biznes-qoǧamdastyqty şoǧyrlandyrudyŋ praktikalyq tetıkterın ıske qosu nüktesıne ainaluy tiıs.
«Bızdıŋ mındetımız — mäselelerdı jai ǧana talqylau emes, özara ıs-qimyldyŋ tūraqty jüiesın qūru, qūzyretterdı arttyru, jūmys beruşılerdıŋ basyn bırıktıru jäne dialogty naqty nätijege ainaldyru», — dep atap öttı Prezidium töraǧasy.
Jūmys beruşıler qauymdastyqtaryn qoldau ortalyǧy jūmys beruşılerdıŋ salalyq jäne öŋırlık bırlestıkterınıŋ äleuetın küşeituge, saraptamalyq jäne ūiymdastyruşylyq qoldaudy damytuǧa, üzdık täjıribelermen almasuǧa jäne biznes müddelerın tiımdı bıldırudı nyǧaituǧa baǧyttalady.
Sonymen qatar, Äiel jūmys beruşıler platformasyn ıske qosu josparlanuda. Ol köşbasşylyqty damytu, täjıribe almasu, äielder käsıpkerlıgın ılgerıletu jäne äielderdıŋ ekonomika men biznes-qoǧamdastyqtaǧy rölın nyǧaitu keŋıstıgıne ainalady. Bastama äiel jūmys beruşılerdı bırıktıruge jäne olardyŋ äleumettık-eŋbek jäne ekonomikalyq kün tärtıbınde şeşımder qabyldauǧa qatysuyn keŋeituge arnalǧan.
J. Janyqūlov atap ötkendei, küştı jūmys beruşıler bırlestıkterı, ädıl äleumettık dialog jäne biznestı şoǧyrlandyru tūraqty ekonomika men bäsekege qabılettı eŋbek naryǧyn qalyptastyrudyŋ negızgı şarttary bolyp tabylady.
Forumǧa eldıŋ tükpır-tükpırınen 600-ge juyq qatysuşy jinaldy, olardyŋ qatarynda memlekettık organdardyŋ, halyqaralyq ūiymdardyŋ, biznestıŋ, jūmys beruşılerdıŋ salalyq jäne öŋırlık qauymdastyqtarynyŋ müşelerı men ökılderı jäne t.b. bar.
