Фото: Қазинформ
Астанада Astana AI Film Festival аяқталды. Қазақстанда алғаш рет өткен фестивальге 125 елден 8 067 өтінім түсіп, өтінім саны бойынша жасанды интеллект көмегімен жасалған фильмдердің әлемдегі ең ірі халықаралық байқауына айналды.
Жобаға Мемлекет басшысы қолдау көрсетті. Қасым-Жомарт Тоқаев фестивальдің ашылуында сөз сөйлеп, жасанды интеллект талантты адамдар мен креативті индустрияларды дамытуға жаңа мүмкіндіктер ашатынын атап өтті.
Бизнестің қолдауы нақты қаржылық сипат алды: Freedom Holding Corp. жанындағы «Freedom Шапағат» корпоративтік қоры жеңімпаздарды марапаттауға 1 млн доллар бөлді. Тағы 1 млн доллар перспективалы AI-командаларға инвестиция салуға және Қазақстандағы өндірісті дамытуға қарастырылған.
Еліміз үшін фестивальдің маңызы кино көрсетілімдерімен ғана шектелмейді. Бұл — авторлар мен инвестиция тартуға, жергілікті командаларды дамытуға және цифрлық технологияларды жаңа шығармашылық жобаларға айналдыруға мүмкіндік. Ұйымдастырушылар қатысушыларды одан әрі қолдауды Қазақстанда компания тіркеу және Astana Hub-қа қатысумен байланыстырады.
Қазақстандық авторлар да нәтижесін көрсетті: Мырзахан Жұмахан «It Was Just a Joke» комедиясындағы үздік кейіпкер үшін марапатқа ие болды. Гран-при мен 450 мың доллар Латвиядан келген Nikolay Shestak-қа «The First Honest Day» фильмі үшін берілді.
Ендігі міндет — фестивальге деген қызығушылықты Қазақстанның ішіндегі тұрақты индустрияға айналдыру.
