Референдумда мақұлданған Қазақстанның жаңа конституциясы елдің халықаралық аренада Ресей үшін сенімді серіктес болып қала беретінін және орыс тілін қорғауды қамтамасыз ететінін көрсетеді. Бұл туралы Қазақстанның Ресейдегі елшісі Дәурен Абаев мәлімдеді.
«Қазақстан халықаралық аренада Ресей үшін болжамды және сенімді серіктес болып қала береді. Біздің еліміз орыс тілінің мәртебесін сақтайды. Сондай-ақ президент Қасым-Жомарт Тоқаев атап өткендей, жаңа Конституция мәтінінің қазақ және орыс тілдерінде бірдей заңды күшпен жариялануы мемлекет тарапынан орыс тілін және Қазақстандағы орыс тілді халықты қорғауға деген ұмтылысты айқын көрсетеді», – деді ол.
Елші сонымен қатар жаңа Конституция Қазақстанның ұзақмерзімді перспективада сенімді әрі тұрақты дамуына жағдай жасайтынын айтты.
«Жаңа Конституция мемлекет қағидаларын адамның құқығы тұрғысынан анықтайды. Негізгі идея – адамның ажырамас құқықтары. Бұл бөлім конституциядағы ең көлемді бөлімдердің бірі болды. <…> Біз үшін жаңа Конституцияны қабылдау – маңызды әрі шешуші оқиға», – деді Абаев.
Ол Ресейге жаңа Конституцияны қабылдау референдумына көрсеткен назары үшін де алғыс білдірді. Айтуынша, референдумды бақылауға Ресейден 92 өкіл қатысқан, олардың ішінде РФ Орталық сайлау комиссиясы мен Сыртқы істер министрлігінің өкілдері бар.
Сондай-ақ елші Мәскеудегі дауыс беру учаскесінде сайлаушылардың белсенді болғанын атап өтті.
«Мәскеуде дәстүрлі түрде дауыс беруге болатын учаске жұмыс істеді. Қатысу деңгейі өте жоғары болды. Ол 87 пайызды құрады, 1 мыңнан астам адам дауыс берді», – деді ол.
