رەفەرەندۋمدا ماقۇلدانعان قازاقستاننىڭ جاڭا كونستيتۋتسياسى ەلدىڭ حالىقارالىق ارەنادا رەسەي ءۇشىن سەنىمدى سەرىكتەس بولىپ قالا بەرەتىنىن جانە ورىس ءتىلىن قورعاۋدى قامتاماسىز ەتەتىنىن كورسەتەدى. بۇل تۋرالى قازاقستاننىڭ رەسەيدەگى ەلشىسى داۋرەن اباەۆ مالىمدەدى.
«قازاقستان حالىقارالىق ارەنادا رەسەي ءۇشىن بولجامدى جانە سەنىمدى سەرىكتەس بولىپ قالا بەرەدى. ءبىزدىڭ ەلىمىز ورىس ءتىلىنىڭ مارتەبەسىن ساقتايدى. سونداي-اق پرەزيدەنت قاسىم-جومارت توقاەۆ اتاپ وتكەندەي، جاڭا كونستيتۋتسيا ءماتىنىنىڭ قازاق جانە ورىس تىلدەرىندە بىردەي زاڭدى كۇشپەن جاريالانۋى مەملەكەت تاراپىنان ورىس ءتىلىن جانە قازاقستانداعى ورىس ءتىلدى حالىقتى قورعاۋعا دەگەن ۇمتىلىستى ايقىن كورسەتەدى»، – دەدى ول.
ەلشى سونىمەن قاتار جاڭا كونستيتۋتسيا قازاقستاننىڭ ۇزاقمەرزىمدى پەرسپەكتيۆادا سەنىمدى ءارى تۇراقتى دامۋىنا جاعداي جاسايتىنىن ايتتى.
«جاڭا كونستيتۋتسيا مەملەكەت قاعيدالارىن ادامنىڭ قۇقىعى تۇرعىسىنان انىقتايدى. نەگىزگى يدەيا – ادامنىڭ اجىراماس قۇقىقتارى. بۇل ءبولىم كونستيتۋتسياداعى ەڭ كولەمدى بولىمدەردىڭ ءبىرى بولدى. <…> ءبىز ءۇشىن جاڭا كونستيتۋتسيانى قابىلداۋ – ماڭىزدى ءارى شەشۋشى وقيعا»، – دەدى اباەۆ.
ول رەسەيگە جاڭا كونستيتۋتسيانى قابىلداۋ رەفەرەندۋمىنا كورسەتكەن نازارى ءۇشىن دە العىس ءبىلدىردى. ايتۋىنشا، رەفەرەندۋمدى باقىلاۋعا رەسەيدەن 92 وكىل قاتىسقان، ولاردىڭ ىشىندە رف ورتالىق سايلاۋ كوميسسياسى مەن سىرتقى ىستەر مينيسترلىگىنىڭ وكىلدەرى بار.
سونداي-اق ەلشى ماسكەۋدەگى داۋىس بەرۋ ۋچاسكەسىندە سايلاۋشىلاردىڭ بەلسەندى بولعانىن اتاپ ءوتتى.
«ماسكەۋدە ءداستۇرلى تۇردە داۋىس بەرۋگە بولاتىن ۋچاسكە جۇمىس ىستەدى. قاتىسۋ دەڭگەيى وتە جوعارى بولدى. ول 87 پايىزدى قۇرادى، 1 مىڭنان استام ادام داۋىس بەردى»، – دەدى ول.
